ట్రాఫిక్ జామ్ లో షాపింగ్

కామెడీ కధ

- పులగం చిన్నారాయణ

మొత్తం మీద బుచ్చిసుందరి హైదరాబాద్ పర్యటన దిగ్విజయంగా ముగిసింది. బుచ్చి (వాళ్లాయన అలాగే పిలుస్తాడు)ది రాజమండ్రి దగ్గర్లోని కోరుకొండ గ్రామం.ఒక్కగానొక్క అన్నయ్య హైదరాబాద్లో భారీ ఎత్తున ఉద్యోగం చేస్తున్నాడని ఊళ్లో గొప్పగా చెప్పుకుంటుంది. అవును మరి.. ప్రైవేట్ కంపెనీలో అకౌంటెంట్ ఉద్యోగమే. అయినాగానీ ఆఫీసు 12వ ఫ్లోర్లో వుంది కాబట్టి భారీ ఎత్తున ఉద్యోగం కిందనే లెక్క కదా!

ప్రతి యేటా తిరునాళ్లకి తూచా తప్పకుండా వచ్చే బుల్లెబ్బాయ్ తన చెల్లిల్ని హైదరాబాద్ రమ్మని ప్రతిసారీ ఆహ్వానిస్తూనే వుంటాడు.

బుచ్చికి కూడా హైదరాబాద్ చూడాలని వుంది. గోల్కొండ కోట, చార్మినార్, ట్యాంక్ బండ్, సాలార్జంగ్ మ్యూజియం, బిర్లామందిర్, కొత్త సచివాలయం, రామోజీ ఫిలింసిటీ..ఇత్యాదివన్నీ చూసెయ్యాలని తెగ ఆరాటం. కానీ ఆ ఉమ్మడి కుటుంబానికి పెద్ద కోడలు తానే కనుక అన్ని పనులూ తానే చూసుకోవాలి. అన్నీ వదిలేసి వెళ్లడం కుదరదు.

చుట్టుపక్కల అమ్మలక్కలేమో “మేం చాలా సార్లు హైదరాబాద్ వెళ్లొచ్చాం.భలేగుంటది..” అని చెప్పడంతో బుచ్చికి మనోవ్యాధి మొదలయ్యింది.