'திராவிட மாடல்' ஆட்சியின் சுயமரியாதை - பகுத்தறிவு வெளிச்சம் ஒளிரும் பட்ஜெட்! புது வரி ஏதும் போடாத பட்ஜெட்!!

பொருளாதார நெருக்கடி மிகுந்த ஒரு சூழலில் அனைத்தையும் உள்ளடக்கிய சிறப்பான பட்ஜெட்!இல்லத்தரசிகளின் கண்ணீர் துடைக்கப்பட்டுள்ளது! பாராட்டுவதற்கு வார்த்தை இல்லை - வாழ்த்துகள்!

பொருளாதார நெருக்கடி மிகுந்த ஒரு சூழலில் னைத்தையும் உள்ளடக்கிய சிறப்பான பட்ஜெட்! இல்லத்தரசிகளின் கண்ணீர் துடைக்கப்பட்டுள்ளது! 'திராவிட மாடல்' ஆட்சியின் சுயமரியாதை - பகுத்தறிவு வெளிச்சம் ஒளிரும் பட்ஜெட்! பாராட்டுவதற்கு வார்த்தை இல்லை - வாழ்த்துகள் என்று  திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் விடுத்துள்ள அறிக்கை வருமாறு:

ஓர் அரசின் நிதிநிலை அறிக்கை என்பது வெறும் வரவு - செலவு கணக்குக்கான ஆண்டறிக்கை மடடுமல்ல; அதையும் தாண்டி, அந்த அரசின் கொள்கை திட்டங்களை செயலாக்கி, மக்களுக்கு நம்பிக்கை ஊட்டுவதோடு, மக்களாட்சியில் நடைபெறும் தேர்தலில் கொடுத்த வாக்குறுதிகளை அவ்வப்போது எப்படியெல்லாம் நிறைவேற்றி, மக்களின் - வாக்காளர்களின் நம்பிக்கையைப் பெருக்குவது என்பதாகும்!

தி.மு.க.வின் தனிமுத்திரை அதன் தேர்தல் அறிக்கையே!

தி.மு.க.வின் தனி முத்திரை அதன் தேர்தல் வாக்கறுதியே! சில தேர்தல்களுக்குமுன் தி.மு.க.வின் தேர்தல் அறிக்கையே இந்திய அரசியலில் கதாநாயகனாகவே வர்ணிக்கப்பட்டதை மறந்துவிட முடியாது!

‘சொன்னதைச் செய்வோம்; செய்வதையே சொல்வோம்' என்பதனை செயலில் நாளும் காட்டி வரும் ஆட்சி, திராவிடர் ஆட்சியான நீதிக்கட்சி ஆட்சியின் நீட்சியான ‘திராவிட மாடல்' ஆட்சி!

முழுமையாக இரண்டு ஆண்டுகள்கூட நிறையாத நிலையில், ‘இந்தியாவின் முதலமைச்சர்களில் முதல் முதமைச்சர்' என்று வடபுலத்து ஏடுகள் பாராட்டி கருத்துக் கணிப்பு வெளியிட்டபோதுகூட, நமது முதலமைச்சர், ‘சமூகநீதிக்கான சரித்திர நாயகர்' மு.க.ஸ்டாலின் அவர்கள், ‘‘நான் முதல் முதலமைச்சராக வருவது எனக்கு முக்கியமல்ல; திராவிட மாடல் ஆட்சி நடக்கும் தமிழ்நாடு முதல் மாநிலமாகத் திகழவேண்டும் என்பது தான் எமது இலக்கு'' என்று மிகுந்த தன்னடக்கத்தோடு குறிப்பிட்டார்!