‘ஸ்டெர்லைட்’ ஆலை - பா.ஜ.க.வுக்குக் கைமாறிய தொகைபற்றி வெளிவந்துள்ள செய்திக்குப் பதில் என்ன?

டெல்டா பகுதிகளில் நிலக்கரி சுரங்கம் ரத்து; ஒன்றிய அரசே அதிகாரப்பூர்வமாக அறிவிக்கவேண்டும்!

தஞ்சை, ஏப்.10  தமிழ்நாட்டில் டெல்டா பகுதிகளில் நிலக்கரி சுரங்கம், ‘ஸ்டெர்லைட்' ஆலைப் பிரச்சினையில் பணம் கைமாறல் குறித்து செய்தியாளர்களிடம் தஞ்சையில் திராவிடர் கழகத் தலைவர் தமிழர் தலைவர் ஆசிரியர் கி.வீரமணி கூறினார்.

வடசேரி, சேத்தியாத்தோப்பு, மைக்கேல்பட்டி ஆகிய பகுதிகளில் நிலக்கரி சுரங்கம் அமைக்க ஒன்றிய அரசு திட்டமிட்டு இருந்ததைக் கண்டித்து, கடந்த 8.4.2023 அன்று தஞ்சையில் உள்ள தலைமை தபால் அலுவலகத்தின் முன் திராவிடர் கழகத்தின் சார்பில் நடைபெற்ற ஆர்ப்பாட்டத்திற்குத் தலைமை தாங்கிய   திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் செய்தியாளர்களுக்குப் பேட்டியளித்தார்.

அவரது பேட்டி வருமாறு:

முழுமையான வெற்றியல்ல; ஆபத்து இருக்கிறது!

செய்தியாளர்: ஒன்றிய அரசு நிலக்கரி சுரங்கம் அமைக்கும் திட்டத்திலிருந்து பின்வாங்கியிருக்கிறது. ஆனாலும், தமிழ்நாட்டின் இந்த வெற்றியை முழுமையாகப் பார்க்க முடியாது; ஆபத்து இருக்கிறது என்று சொல்கிறீர்களே, அதற்கு என்ன காரணம்?

தமிழர் தலைவர்:  ஏற்கெனவே கொடுத்த உத்தர வாதங்கள் எல்லாம் நிரந்தரப்படுத்தப்பட வேண்டும் என்பதில் எப்பொழுதும் விழிப்பாக இருக்கவேண்டும் என்பதுதான் எங்களுடைய நிலை.

இதைவிட இப்பொழுது வந்திருக்கின்ற இன் னொரு செய்தி பூவுலக நண்பர்கள் அமைப்பு, முற்றிலும் இதுபற்றி அதிகமாகக் கவலைப்படக்கூடிய தமிழ் நாட்டில் செயல்படக்கூடிய அமைப்பு.

ஒன்றிய அமைச்சர் சொன்னதுபோல, முழுமையாக அந்தத் திட்டம் பின்வாங்கப்படவில்லை. ஒரு குறிப்பிட்ட அளவுதான் அறிவித்திருக்கின்றார் என்று அய்யத்தோடு சொல்லியிருக்கிறது.

எனவேதான், அந்தப் பிரச்சினை முழுமையாகத் தீர்ந்துவிட்டது என்பதற்கு வெறும் அமைச்சருடைய பதில் மட்டும் போதாது.

ஒன்றிய அரசினுடைய அதிகாரப்பூர்வமான அறி விப்பு, அரசு ரீதியாக வரவேண்டும்.