தமிழ்நாடே முதல் மாநிலம்-இலக்கை நோக்கி பயணிப்போம்!

ஈராண்டு ஆட்சி நிறைவையொட்டி முதலமைச்சர் மு.க. ஸ்டாலின் உறுதி

சென்னை, மே 3- தமிழ்நாடே முதல் மாநிலம் - இலக்கை நோக்கி பயணிப்போம் என்றும், சமூகநீதிக்கு தமிழ்நாடு தான் தலைநகர் என்றும் ஈராண்டு ஆட்சி நிறைவையொட்டி முதலமைச்சர் மு.க.ஸ்டாலின் தெரிவித்துள்ளார். 

தமிழ்நாடு முதலமைச்சர் மு.க.ஸ்டாலின் உங்களில் ஒருவன் கேள்வி - பதில் நிகழ்ச்சியில் கலந்து கொண்டார். 

கேள்விகளுக்கு அவர் அளித்த பதில்கள் பின்வருமாறு: 

கேள்விகளுக்குப் பதில் சொல்வதற்கு முன்னால், முதலில் என்னுடைய நன்றியையும், மகிழ்ச்சியையும் தெரிவித்துக் கொள்கிறேன்.

எதற்கா?

நம்முடைய திராவிட மாடல் அரசு, ஆட்சிப் பொறுப்பேற்று இரண்டாண்டு ஆக போகிறது. அதற்குத்தான்!

இந்த இரண்டு ஆண்டுகளில்,

* மகளிருக்கு இலவசப் பேருந்து,

* பள்ளிக் குழந்தைகளுக்குக் காலைச் சிற்றுண்டித் திட்டம்,

* அரசுப் பள்ளிகளில் பயின்ற மாணவிகளின் உயர் கல்விக்கு மாதம்தோறும் ஆயிரம் ரூபாய் வழங்கும் புதுமைப் பெண் திட்டம்,

* தமிழ்நாட்டு மாணவர்களுக்குத் திறன் பயிற்சி அளித்து வேலைவாய்ப்பை உருவாக்கித் தரும் ''நான் முதல்வன் திட்டம்'' - என, இவ்வாறு எண்ணற்ற முன்னோடி மக்கள் நலத் திட்டங்களைச் செய்து காட்டியிருக்கிறோம்.

இந்த வேகம் கொஞ்சமும் குறையாமல், இன்னும் வேகத்துடன் இதுபோன்ற திட்டங்கள் தொடரும்.

நம்பர் 1  தமிழ்நாடு என்ற நம்முடைய இலக்கை நோக்கி செல்வோம்.

கேள்வி: ஆளுநர்கள் சட்டமன்ற மசோதாக்களுக்கு ஒப்புதல் அளிக்க கால நிர்ணயம் செய்யப்பட வேண்டும் என்ற உங்களின் சட்டமன்றத் தீர்மானம் இந்தியா முழுவதும் எதிரொலிக்கிறதே. உச்சநீதிமன்றமும் இதே கருத்தை வலியுறுத்தியிருக்கிறதே?

பதில்: உண்மைதான். இந்தியா முழுமைக்குமானதுதான் தமிழ்நாட்டுடைய குரல். சமூகநீதிக்கு தமிழ்நாடுதான் தலை நகர். அதேபோலத்தான், மாநில சுயாட்சி உரிமைகளுக்கும் தமிழ்நாடுதான் தலைநகர்.