திராவிடத்துத் தீரரான நம் கலைஞருக்கு வீர வணக்கம் செலுத்துகிறோம்!

திராவிடத்துத் தீரர் முத்தமிழ் அறிஞர் மானமிகு கலைஞர் அவர்களை நினைவுகூரும் வண்ணம் - அவர் வாழ்ந்த ஊரில் ‘‘கலைஞர் கோட்டமும், கலைஞர் சிலையும்'' திறக்கப்படுவது குறித்து பெருமகிழ்ச்சியோடு, நன்றி உணர்வுடன் வீர வணக்கம் செலுத்தும் வகையில் திராவிடர் கழகத் தலைவர் ஆசிரியர் கி.வீரமணி அவர்கள் அறிக்கை விடுத்துள்ளார்.

* முத்தமிழ் அறிஞர் கலைஞருக்குத் தலைநகரில் சிலை எழுப்பவேண்டும் என்று தந்தை பெரியார் முன்வந்த பேறு யாருக்குக் கிடைக்கும்?

* திருவாரூர் காட்டூரில் இன்று ''கலைஞர் கோட்டம்'' - சிலை திறப்பு!

* ‘திராவிட மாடல்' அரசின் நாயகர் முதலமைச்சர் மு.க.ஸ்டாலின் அவர்களுக்குப் பாராட்டு!

* வரலாற்றைத் திருப்பிப் பார்ப்போம்!

அவரது அறிக்கை வருமாறு:

இன்று (20.6.2023) நமது மானமிகு சுயமரியாதைக் காரராக இறுதிவரை வாழ்ந்து, வரலாறு படைத்த முத்தமிழறிஞர் கலைஞர் அவர்களது நூற்றாண்டு தொடக்கத்தையொட்டி, அவர் பிறந்த மண்ணான திருவாரூரில் (காட்டூரில்) மிக்கப் பொருத்தமாக "கலைஞர் கோட்டம்'' அமைக்கப்பட்டு திறக்கப்படுகிறது!

திருவாரூர் - காட்டூரில் "கலைஞர் கோட்டம்'' இன்று திறப்பு!

கலைஞரின் சிலை அவரால் பயிற்றுவிக்கப்பட்டு, ‘திராவிட மாடல்' அரசின் மாண்பை இந்தியாவிற்கே பறைசாற்றி, எதேச்சதிகார ஆக்டோபஸ் கொடுங்கரங்களுக்குள் சிக்கவிடாமல் தடுக்கும் அரசியல் போர்ப் படைத் தளபதியான நமது முதலமைச்சர் மாண்புமிகு முத்துவேல் கருணாநிதி ஸ்டாலின் அவர்களால் இன்று (20.6.2023) மாலை திறக்கப்படுகிறது.

அசோகர் ஆண்ட பூமியிலிருந்து, அதை ஆளும் முதலமைச்சர், கைதேர்ந்த அரசியல் வல்லுநரான நிதிஷ்குமார் அவர்களால், "கலைஞர் கோட்டம்'' திறந்து வைக்கப்பட உள்ளது.