ഉദ്ദിഷ്ടകാര്യസിദ്ധിക്ക് വിനായകൻ

വ്രതനിഷ്ഠയോടെ വിനായകചതുർത്ഥി ആചരിച്ചാൽ ഗുണാനുഭവങ്ങൾ വർദ്ധിക്കും. അസാധ്യമായ കാര്യങ്ങൾ വരെ സാധിക്കുന്നതിന് വഴിതെളിയും. കൂടാതെ ഉദ്ദിഷ്ടകാര്യസിദ്ധി, മംഗല്യഭാഗ്യം, ദാമ്പത്യക്ലേശശാന്തി, ഐശ്വര്യം, രോഗനിവാരണം ധനാഭിവൃദ്ധി, ശത്രുദോഷശമനം, വിദ്യാഭിവൃദ്ധി തുടങ്ങിയ ഗുണാനുഭവങ്ങളും ഉണ്ടാകും.

- വാസുദേവഭട്ടതിരി കീഴില്ലത്തിൽ

ഗണേശ പൂജയ്ക്ക് ഏറ്റവും അനുയോജ്യമായ ദിവസമാണ് വിനായക ചതുർത്ഥി ലോകമെമ്പാടുമുള്ള വിശ്വാസികൾ അതിഗംഭീരമായ ആഘോഷിക്കുന്ന ഒരു സന്ദർഭമാണ് വിനായക ചതുർത്ഥി. ചിങ്ങമാസത്തിലെ (ശ്രാവണമാസം) ശുക്ലപക്ഷത്തിലാണ് വിനായക ചതുർത്ഥി വരുന്നത്. കറുത്തവാബ് കഴിഞ്ഞ് നാലാം ദിവസം (ആഗസ്റ്റിനും - സെപ്റ്റംബറിനും ഇടയിൽ വരും) വടക്കേ ഇന്ത്യയിൽ രണ്ടു മുതൽ 12 ദിവസം വരെ നീളുന്ന ആഘോഷമായി വിനായക ചതുർത്ഥി കൊണ്ടാടുന്നു. 11 ദിവസം വീട്ടിലും അമ്പലങ്ങളിലും വെച്ച് പൂജിച്ച ഗണപതി വിഗ്രഹം പന്ത്രണ്ടാം നാൾ കടലിൽ ഒഴുക്കി കളയുന്നതോടെ ഗണേശൻ വീണ്ടും കെലാസത്തിലേക്ക് മാതാപിതാക്കളുടെ അടുത്തേക്ക് പോകുന്നു എന്നാണ് വിശ്വാസം. മഹാരാഷ്ട്രയിലാണ് ഇത്തരത്തിലുള്ള ഗണേശ പൂജ ഏറ്റവും കൂടുതൽ വ്യാപകമായിട്ടുള്ളത്.

ചതുർത്ഥിക്ക് ചന്ദ്രനെ കാണരുത്

വിനായക ചതുർത്ഥി ദിവസം ചന്ദ്രനെ കാണരുത്. അഥവ ചന്ദ്രനെ കണ്ടാൽ ദുഷ്കീർത്തി, അപമാനം, നഷ്ടങ്ങൾ എന്നിവ സംഭവിക്കാം.

വിനായക ചതുർത്ഥിക്ക് വീടുകളിൽ ഗണേ ശയന്ത്രം വരയ്ക്കുകയും ഗണേശവിഗ്രഹങ്ങൾ പൂജിക്കുകയും ചെയ്യാറുണ്ട്. ഗണേശപൂജയ്ക്ക് നിർമ്മിക്കുകയോ വാങ്ങിക്കുകയോ ചെയ്യുന്ന വിഗ്രഹങ്ങൾ ലക്ഷണമൊത്തവയാകണം. വൈകല്യം പാടില്ല. വിഗ്രഹത്തിനൂപഭംഗിയും പൂർണ്ണതയും ഉണ്ടാകണം. ഗണേശപൂജയ്ക്ക് ഏറ്റവും പ്രധാനം കറുകയാണ്. ഇത് ഗണേശനെ ധ്യാനിച്ച് ഗണേശമന്ത്രം ചൊല്ലി വിഗ്രഹപാദത്തിൽ പതിക്കത്തക്കവണ്ണം അർപ്പിക്കണം. പൂജയ്ക്ക് മുമ്പ് വെറ്റില, അടയ്ക്ക, പപൂജാപുഷ്പങ്ങൾ കിണ്ടിയിൽ ജലം തുടങ്ങിയ പൂജാസാധനങ്ങൾ തയ്യാറാക്കി വയ്ക്കണം. പൂജയ്ക്ക് ഇരുന്നാൽ പിന്നെ പൂജ കഴിയാതെ എഴുന്നേൽക്കരുത്. പൂജയിൽ ഗണപതിയുടെ ഇഷ്ടഭോജ്യങ്ങളായ മധുരക്കൊഴുക്കട്ട അട, ഉണ്ണിയപ്പം, മോദകം തുടങ്ങിയ തുടങ്ങിയ പലഹാരങ്ങളും അവലും മലരും നേദിക്കണം. നിലവിളക്ക് നെയ്യോ എള്ളെണ്ണയോ ഒഴിച്ച് കത്തിക്കണം. ഇങ്ങനെ പൂജിച്ച ഗണേശവിഗ്രഹം വിനായകചതുർത്ഥിയുമായി ബന്ധപ്പെട്ട് നടക്കുന്ന ഗണേശോത്സവത്തിന് ശേഷം ആത്മാർത്ഥമായ ഭക്തിയോടെ പുഴയിലോ കടലിലോ നിമജ്ജനം ചെയ്യണം.

വിനായകചതുർത്ഥി ദിവസത്തെ ഗണേശപൂജ ജീവിതത്തിലെ സർവ്വ ദുഃഖങ്ങളും അകറ്റാനും വിവേചന ശക്തിയും ആത്മബോധവും വർദ്ധിക്കാനും ഉപകരിക്കും.