ఆరోగ్య 'యోగం'!

ఈ లోకంలో విద్యార్థి నుండి వయోవృద్ధుని వరకూ ప్రతి ఒక్కరూ ఆరోగ్యంగా, ఆనందంగా ఉండాలని కోరుకుంటారు.జీవితపు ప్రతి దశలోనూ శరీర ఆరోగ్యం అత్యంత కీలకం.

- - శ్రీమతి గంగవరం శ్రీదేవి

“మనస్సునూ, శరీరాన్నీ పవిత్రంగా, ఆరోగ్యంగా ఉంచుకోండి. అవి మనం భగవంతుణ్ణి చేరుకోవడానికి సాధనాలు. అదే వాటి అసలైన ఉద్దేశం." - స్వామి వివేకానంద

ఈ లోకంలో విద్యార్థి నుండి వయోవృద్ధుని వరకూ ప్రతి ఒక్కరూ ఆరోగ్యంగా, ఆనందంగా ఉండాలని కోరుకుంటారు.జీవితపు ప్రతి దశలోనూ శరీర ఆరోగ్యం అత్యంత కీలకం.విద్యార్థులు తమ చదువులు నిరాటంకంగా కొనసాగించాలన్నా, ఉద్యోగస్థులు తమ కార్యాలయ, కుటుంబ బాధ్యతలను సక్రమంగా నిర్వర్తించాలన్నా, వృద్ధులు తమ పనులు తాము చేసుకోవాలన్నా, చివరకు ఆధ్యాత్మిక సాధన చేసుకునేవారైనా సరే... ఆరోగ్యంగా ఉంటేనే సాధ్యపడుతుంది. ధర్మార్థ కామ మోక్షాలను సాధించాలంటే శరీరమే సాధనం. అందుకే ఈ శరీరం కోసం ఎంతోకొంత సమయం కేటాయించి, దానిని ఆరోగ్యంగా ఉంచడం మన బాధ్యత. అలాగని ప్రతి ఒక్కరూ కండలు పెంచి, శరీరాకృతిని సాధించాలని కాదు. అది అందరికీ సాధ్యపడదు, అవసరమూ లేదు. అయితే, కేవలం శరీరస్థాయిలోనే మనం ఆగిపోకూడదు. బుద్ధిజీవులం కాబట్టి మరింత శ్రేయస్సును అందుకోవడానికి ప్రయత్నించాలి. భగవంతుడే ఆ శ్రేయస్సు.

ఆధునిక యుగం ప్రాచీన యోగం : ఈరోజు ప్రపంచమంతా వినపడుతున్న మాట 'యోగా'. ఇది మన ప్రాచీన వారసత్వ సంపద. దీనిని మనం ఆచరణలో పెడితే చాలు...శరీరం, మనస్సు కూడా ఉత్తేజభరితం, ఉత్సాహపూరితం అవుతాయి. వయో తారతమ్యం లేకుండా వచ్చిపడుతున్న ఆధునిక రోగాలన్నీ నియంత్రించబడతాయి. కొన్ని సందర్భాల్లో రోగాలు పూర్తిగా నయమవుతాయి కూడా!

వ్యాయామశాలల్లో చేసే వ్యాయామాలకు అనేక ఉపకరణాలు అవసరం. శ్రమ అధికం. పైగా ఆహారం కూడా ఎక్కువగా తీసుకోవాల్సి వస్తుంది. కండపుష్టి కలుగుతుందిగానీ,శరీరం లోపలి అవయవాలకు సంపూర్ణ ఆరోగ్యం చేకూరదు.యోగాసనాలైతే ఎటువంటి ఉపకరణాలూ లేకుండానే, ఇంటిలోనే అభ్యాసం చేసుకోవచ్చు. కాకపోతే మొదట్లో కొన్నాళ్ళు శిక్షకుని సమక్షంలో అభ్యాసం చేయాలి. ఆసనాలు, ప్రాణాయామం వల్ల నాడీమండలం చురుగ్గా పనిచేస్తుంది.రోగనిరోధకశక్తి పెరుగుతుంది.