యువతకు ఆదర్శం స్వామి వివేకానంద మిలి - కొవ్వూరి భవానీ

జనవరి 12న 'జాతీయ యువజన దినోత్సవం' (స్వామి వివేకానంద జయంతి - ఆంగ్ల తేదీ ప్రకారం)

- కొవ్వూరి భవానీ

ఎందరో ఋషులు, యోగులు, మహాత్ములను అందించిన మహోన్నత ధర్మం మన సనాతనధర్మం. ఈ దేశంలో జన్మించిన యోగులు, మహాపురుషుల జీవన విధానం, జీవిత విశేషాలను పరిశీలించినప్పుడు, ఈ ధర్మం విశిష్టత, ఔన్నత్యం మనకు అవగతం అవుతాయి. భగవదంశ సంభూతులైన మహాత్ములు తమ పావన జీవనంతో పుష్పాల సౌరభం తుమ్మెదలను ఆకర్షించే చందాన ముముక్షువులను ఆకర్షిస్తారు. అలాంటి దివ్యజీవన గంగాప్రవాహం 19వ శతాబ్దంలో కోల్కతాలోని రాణీ రాస్మణి నిర్మించిన దక్షిణేశ్వర భవతారిణి కాళికాలయమందు జిజ్ఞాసువుల జ్ఞాన పిపాసను తీర్చడానికి మహెూత్తుంగ తరంగమై ప్రవహించింది. సత్యనిష్ఠ, కామ కాంచన విజయాలను మేళవించి మూర్తీభవించిన ఆ మహాపురుషుని దివ్య సౌరభం దేశమంతా వ్యాపించింది. ఆయన వచనామృతాన్ని గ్రోలడానికి ఎందరో ముముక్షువులు అరుదెంచారు. ఆ త్యాగపురుషులే శ్రీరామకృష్ణ పరమహంస!