സ്കൂളുകളിലെ പരിണാമപഠനം

എന്തെല്ലാം പഠിപ്പിക്കണം? എങ്ങനെ പഠിപ്പിക്കണം?

- ഡോ. പി. കെ. സുമോദൻ റിട്ട.അധ്യാപകൻ, ജന്തുശാസ്ത്ര വിഭാഗം, മഠപ്പള്ളി ഗവ.കോളേജ്, ഫോൺ: 9846135324

എക്കാലത്തെയും മികച്ച ശാസ്ത്രനേട്ടങ്ങളിലൊന്നാണ് പരിണാമസിദ്ധാന്തം. സൂര്യകേന്ദ്രസിദ്ധാന്തം (helio centrism), ആപേക്ഷികതാസിദ്ധാന്തങ്ങൾ, ഫലകചലനസിദ്ധാന്തം (plate tectonics theory) തുടങ്ങിയ സിദ്ധാന്തങ്ങളെപ്പോലെ പ്രാധാന്യമുള്ള പരിണാമ സിദ്ധാന്തം എന്തിന് പഠിപ്പിക്കണം എന്നതുപോലെ തന്നെ പ്രസക്തമാണ് പരിണാമസിദ്ധാന്തത്തിലെ ഏതെല്ലാം ഭാഗങ്ങൾ പഠിപ്പിക്കണം, എങ്ങനെ പഠിപ്പിക്കണം എന്നതും. ഈ ചോദ്യങ്ങൾക്കുള്ള ഉത്തരങ്ങളിലെത്തും മുമ്പ് കഴിഞ്ഞ വർഷംവരെ സി.ബി.എസ്.ഇ.(CBSE) തലത്തിൽ പഠിപ്പിച്ചതും ഇപ്പോഴും കേരള സിലബസിൽ പഠിപ്പിച്ചുകൊണ്ടിരിക്കുന്നതുമായ പരിണാമവിഷയങ്ങൾ എന്തൊക്കെയാണെന്ന് പരിശോധിക്കാം (പട്ടിക-1).

ഒറ്റ നോട്ടത്തിൽ രണ്ട് സിലബസുകളും ഏകദേശം ഒരു പോലെയാണന്നും പരിണാമവുമായി ബന്ധപ്പെട്ട അടിസ്ഥാന കാര്യങ്ങളെല്ലാം ഉൾപ്പെടുത്തിയിട്ടുണ്ടെന്നും തോന്നാം. അപ്പോഴും തുടക്കത്തിൽ ഉയർത്തിയ രണ്ട് ചോദ്യങ്ങളും ബാക്കിയാണ്. ഇത്രമാത്രം പഠിപ്പിച്ചാൽ മതിയോ? ഇങ്ങനെ പഠിപ്പിച്ചാൽ മതിയോ? ഒരു താരതമ്യത്തിന് ഫ്രാൻസിലെ സിലബസിൽ പരിണാമം ഏതുനിലയ്ക്കാണ് ഉൾപ്പെടുത്തിയത് എന്ന് പരിശോധിക്കാം.

ഫ്രഞ്ച് രീതി