ഗോലിയാത്തുകൾ വീഴുമ്പോൾ

ഓരോ അട്ടിമറികളുടെ അവിസ്മരണീയ ചരിത്രം കൂടി അടയാളപ്പെടുത്തുന്നതാണ് ലോകകപ്പും. ഖത്തർ ലോകകപ്പിലും ആ ചരിത്രത്തിന്റെ ആവർത്തനമാണ് സംഭവിച്ചത്. ദുർബലർ എന്ന് എഴുതിത്തള്ളിയവർ ഉയിർത്തെഴുന്നേൽക്കുന്നതും പുതിയ ചരിത്രം രചിക്കുന്നതും ലോക കപ്പുകളിലുടനീളം നാം കണ്ടു. ലോകകപ്പിലെ ചില അട്ടിമറികൾ..

- കെ.എം. നരേന്ദ്രൻ

ലോകകപ്പിന്റെ സൗന്ദര്യമെന്നത് കഴിവിന്റെയും കരുത്തിന്റെയും പ്രദർശനമാണ്. കൂടെ കഴിവും കരുത്തുമുള്ളവരെ അതില്ലാത്ത ദുർബലർ വീഴ്ത്തുന്നതുമാണ് (ഇതിനെ സൂചിപ്പിക്കാൻ അട്ടിമറി എന്ന ഒരു ഭംഗിയുമില്ലാത്ത വാക്കേ മലയാളത്തിലുള്ളൂ). ലോകചരിത്രത്തിലെ ആദ്യത്തെ അട്ടിമറി ദാവീദ് ഗോലിയാത്തിനെ വീഴ്ത്തിയതാണ്. ഇന്നും ഗോലിയാത്തിന്റെ പതനം നമ്മൾ കഥകളായി പറഞ്ഞുകൊണ്ടിരിക്കുന്നു. അതാണ് അട്ടിമറിയുടെ സൗന്ദര്യം.

ഓരോ അട്ടിമറിയും ദുർബലർക്ക് പ്രതീക്ഷകൾ നൽകുന്നു. കാരണം ദുർബലർ ചരിത്രത്തിലുടനീളം ദുർബലരായി തുടരുകയാണല്ലോ. വാസ്തവത്തിൽ ജനകീയമായ കളി എന്ന് പേരുള്ള ഫുട്ബോളിൽ അട്ടിമറികൾ സ്ഥിരമായി സംഭവിക്കണമായിരുന്നു. പക്ഷേ, ലോകകപ്പ് ഫുട്ബോൾ മറ്റ് പല രംഗങ്ങളേക്കാൾ യാഥാസ്ഥിതികമാണ്. കരുത്തരായ ഏഴെട്ട് രാഷ്ട്രങ്ങൾ എക്കാലവും ലോകകിരീടം കുത്തകയായി വയ്ക്കുകയാണ്. ലോകകപ്പിന്റെ കഴിഞ്ഞ ആറേഴ് ദശകങ്ങളുടെ ചരിത്രമെടുത്തുനോക്കൂ. ബ്രസീൽ, അർജന്റീന, ജർമനി, ഇറ്റലി, ഫ്രാൻസ്, ഇംഗ്ലണ്ട്, സ്പെയിൻ. ഈ ഏഴുരാജ്യങ്ങളേ ചാമ്പ്യന്മാരാവൂ. ചാമ്പ്യന്മാരായില്ലെങ്കിലും തൊട്ടുതാഴെ ഹോളണ്ടുമുണ്ട്.

ഇവരാണ് ലോക ഫുട്ബോളിന്റെ എട്ടുദിക്കുകൾ കാക്കുന്ന അഷ്ടദിഗ്ഗജങ്ങൾ. ഈ ടീമുകളെ നേരിടുന്നവർക്ക് ചാവേറുകളുടെ വിധിമാത്രം. കഴിഞ്ഞ ലോകകപ്പിൽ ക്രൊയേഷ്യ നമ്മുടെ മനം കവർന്നത് അവർ വമ്പന്മാരെ വീഴ്ത്തി ഫൈനൽ വരെ എത്തി എന്നതു കൊണ്ടാണ്. ഒടുവിൽ അഷ്ടദിഗ്ഗജങ്ങളിൽ ഒന്നായ ഫ്രാൻസ് ക്രൊയേഷ്യയെ തോൽപ്പിച്ച് രാജവാഴ്ച നിലനിർത്തി. ഇത്തവണ ലോകകപ്പിന്റെ തുടക്കത്തിൽ അട്ടിമറികൾ കണ്ടു. സൗദി അറേബ്യ അർജന്റീനയെയും ജപ്പാൻ ജർമനിയെയും തോൽപ്പിച്ചു. എന്നുവെച്ച് ഇത്തവണ ഈ എട്ടിലും ഉൾപ്പെടാത്ത ഒരു ടീം ലോകചാമ്പ്യന്മാരാകും എന്ന അമിത വിശ്വാസമൊന്നും ഈ ലേഖകനില്ല. ഈ ലേഖനം പ്രസിദ്ധീകരിക്കുമ്പോഴേക്കും ദാവീദുമാർ വീണുപോയിട്ടുണ്ടാകും. എങ്കിലും സൗദിയും ജപ്പാനും ദുർബലരായ ടീമുകൾക്ക് നൽകുന്ന ആത്മവിശ്വാസം ഈ ലോകകപ്പ് കഴിഞ്ഞാലും നിലനിൽക്കും.