സചാച്ചുവിന്റെ ലോകം

മുംബൈയിലെ ഇടത്തരം മധ്യവർഗകുടുംബത്തിൽ ജനിച്ച സച്ചിൻ തെണ്ടുൽക്കർ ക്രിക്കാകമടക്കിവാണ ചാമ്പ്യനും ദേശീയ നായകനുമായിത്തീർന്നതിനു പിന്നിൽ സംഭവബഹുലവും നാടകീയവുമായ ഒരു കഥയുണ്ട്. തിരിച്ചടികളിൽനിന്ന് കരകയറി വിജയം വരിക്കാനുള്ള കഴിവ് സച്ചിന് ചെറുപ്പം തൊട്ടേ ഉണ്ടായിരുന്നു.

- കെ വിശ്വനാഥ്

സമ്പന്നമായൊരു കുടുംബ മായിരുന്നില്ല സച്ചിന്റെത്. അച്ഛൻ രമേഷ് സിദ്ധാർഥ കോളേജിൽ അധ്യാപകൻ. അമ്മ രജനി ലൈഫ് ഇൻഷുറൻസ് കോർപ്പറേഷനിലെ ക്ലാസ് ത്രി ജീവനക്കാരിയും. എങ്കിലും മക്കളുടെ ആവശ്യങ്ങൾ പരമാവധി നിറവേറ്റിക്കൊടുക്കാൻ രണ്ടുപേരും ശ്രദ്ധിച്ചിരുന്നു. രമേഷിന് ചെറുപ്പത്തിലേ ക്രിക്കറ്റിനോട് താത്പര്യമായിരുന്നു. അതുകൊണ്ടുതന്നെ തന്റെ മക്കൾ അജിത്തും സച്ചിനും ക്രിക്കറ്റിനോട് അഭിനിവേശം കാണിക്കുന്നതിൽ അദ്ദേഹം മനസ്സിൽ സന്തോഷിച്ചിരുന്നു. എന്നാൽ രജനിക്ക് കളിയോട് ഒട്ടും താത്പര്യമുണ്ടായിരുന്നില്ല. അജിത്തും സച്ചാച്ചുവും (അമ്മ വിളിച്ചിരുന്നത് അങ്ങനെയാണ്) മറ്റ് കുട്ടികൾക്കൊപ്പം തെരുവിൽ ക്രിക്കറ്റ് കളിക്കുന്നത് കണ്ടപ്പോഴാണ് ഞാൻ അങ്ങനെയൊരു കളിയെക്കുറിച്ച് ശ്രദ്ധിച്ചതുതന്നെ രജനി പറയുന്നു.

സച്ചാച്ചു കൊച്ചുനാളിൽ വലിയ നാണക്കാരനായിരുന്നു. അധികം സുഹൃത്തുക്കളില്ല. അപരിചിതരോട് ഇടപഴകുകയേ ഇല്ല. എന്നാൽ ക്രിക്കറ്റ് ഗ്രൗണ്ടിലെത്തിയാൽ അവനാകെ മാറും. സ്കൂൾ വിട്ടാൽ നേരേ ബസ്സിൽ ശിവാജി പാർക്കിലേക്ക് പോവും. അവിടെയാണ് കളി. ഇതിനിടയിൽ ഭക്ഷണത്തെക്കുറിച്ചുപോലും ഓർക്കാറില്ല. ശിവാജിപാർക്കിനടുത്ത് അവന്റെ അമ്മാവനും അമ്മായിയും താമസിച്ചിരുന്നു. ഞാനവരോട് പറയും എന്റെ മകന് എന്തെങ്കിലും കഴിക്കാൻ നൽകണമെന്ന്. പക്ഷേ, സച്ചാച്ചു കളിക്കാൻ പോയാൽ ഭക്ഷണത്തെക്കുറിച്ച് ഓർക്കുകയേയില്ല. കളിക്കിടെ പഠനത്തിൽ ശ്രദ്ധിക്കാതിരിക്കരുതെന്ന് ഞാനിടയ്ക്ക് അവനോട് പറയും. അതോർത്ത് അമ്മ വിഷമിക്കേണ്ട എന്നാവും അവന്റെ മറുപടി - രജനി ഓർക്കുന്നു.

കടുത്ത ദൈവ വിശ്വാസിയാണ് കുഞ്ഞുനാൾ മുതൽ സച്ചിൻ. ശിവാജി പാർക്കിൽ ഒരു ചെറിയ ഗണപതിക്ഷേത്രമുണ്ട്. കളിക്കാൻ പോവുമ്പോൾ ദിവസവും സച്ചിൻ അവിടെപ്പോയി പ്രാർഥിക്കും. ഇന്നും വിനായകഭക്തി സച്ചിനുണ്ട്. ഇപ്പോൾ പകൽ സമയത്ത് അവിടെ പോവാൻ പറ്റില്ല. കാരണം, സച്ചിൻ എവിടെപ്പോയാലും ആരാധകർ കൂടും. പിന്നെ പ്രാർഥന നടക്കില്ല. അതുകൊണ്ട് അർധരാത്രിയിലാണ് ഇപ്പോൾ സച്ചിൻ ഇഷ്ടദൈവത്തിന്റെ ക്ഷേത്രത്തിൽ  പോവുക. ഷിർദി സായിബാബയുടെയും ഭക്തനാണ്. കുഞ്ഞു നാളിലെ സച്ചിൻ ബാറ്റും പാഡും എല്ലാം സൂക്ഷിക്കുന്ന പെട്ടിയുടെ ഉള്ളിൽ ഇന്ത്യൻ പതാകയ്ക്കൊപ്പം ഗണപതിയുടെയും ഷിർദി സായിബാബയുടെയും ചിത്രങ്ങൾ ഒട്ടിച്ചുവെച്ചിരുന്നു. ആ പതിവ് ഇന്നും തുടരുന്നു.