മംഗളൂരുവിലെ മുറു ഫ്രൈയും ചില കുടക് രുചികളും

സപ്തസംഗമഭൂമിയായ മംഗളൂരുവിൽ രുചികളിലും ആ വൈവിധ്യ നിറഞ്ഞുനിൽക്കുന്നു. കടൽവിഭവങ്ങളും കുടക് രുചികളും കന്നഡിഗർക്ക് മാത്രമല്ല മലയാളികൾക്കും പ്രിയമേറിയതാണ്.

- ARUN P GOPI

ബന്ദർ കടപ്പുറത്ത് ചരൺ കാത്തുനിൽപ്പുണ്ടായിരുന്നു. കടലാഴങ്ങളെ അറിയുന്ന നാവികനാണയാൾ. ജി.പി.എസ്. ഇല്ലാതിരുന്ന കാലത്ത് വടക്കുനോക്കി യന്ത്രം ഉപയോഗിച്ച് കടലിന്റെ ദിശ മനസ്സിലാക്കി സഞ്ചരിച്ച നാവികൻ ഇന്ന് മംഗളൂരുവിലെ ക്രൂയിസ് ആൻഡ് ഡൈൻ റസ്റ്റോറന്റിന്റെ അമരത്താണ്. മംഗളൂരുവിലെ രുചിവൈവിധ്യങ്ങൾ തേടി ഒരു യാത്ര ഒരുങ്ങിയപ്പോഴാണ് ചരണിനെക്കുറിച്ച് സുഹൃത്ത് പറഞ്ഞറിയുന്നത്. മംഗളൂരുവിലെ ബന്ദർ പോർട്ടിലാണ് ചരൺദാസിന്റെ റസ്റ്റോറന്റ് സ്ഥിതിചെയ്യുന്നത്. പേരുപോലെ, കടൽവിഭവങ്ങളാൽ സമ്പന്നമായ ഒഴുകി നടക്കുന്ന ബോട്ട് ഹോട്ടലാണ് ക്രൂയിസ് ആൻഡ് ഡൈൻ റസ്റ്റോറന്റ്.

ഡിസ്കവറി ചാനലിനൊപ്പം നാവികനായി നിരവധി രാജ്യങ്ങളിൽ സഞ്ചരിച്ച ശേഷം പത്തുവർഷം മുൻപാണ് ചരൺ ഈ റസ്റ്റോറന്റ് തുടങ്ങുന്നത്. പുലർച്ചെ അദ്ദേഹം, തന്റെ ചെറിയ ബോട്ടിൽ ഉള്ളാൾ കടപ്പുറത്തു പോയി ഫ്രഷ് മത്സ്യങ്ങൾ കൊണ്ടുവരും. അതാണ് ഉച്ചയ്ക്ക് തീൻമേശകളെ സമൃദ്ധമാക്കുന്നത്. വൈവിധ്യമാർന്ന സമുദ്രവിഭവങ്ങളാൽ സമ്പന്നമാണ് മംഗളൂരു. മലയാളിത്തനിമയും കന്നഡ രുചിയും സമ്മേളിക്കുന്ന രുചിക്കൂട്ട്. മസാലയും തേങ്ങയും നന്നായി ചേർത്ത് പാകം ചെയ്യുന്ന മീൻകറികൾ കാണുമ്പോഴേ വായിൽ വെള്ളമൂറും.

ബന്ദർ കടപ്പുറത്ത് മൂന്ന് ബോട്ടുകളിലായാണ് ഈ റസ്റ്റോറന്റ് പണിതിട്ടുള്ളത്. ബോട്ടിന്റെ മുകൾത്തട്ട് ഹോട്ടൽ മാതൃകയിൽ ഒരുക്കിയിരിക്കുന്നു. ഉച്ചയോടെ ബോട്ട് ഹോട്ടലിൽ എത്തുമ്പോൾ തീരെ തിരക്കുണ്ടായിരുന്നില്ല. എന്നാൽ അല്പസമയത്തിനകം ഹോട്ടൽ നിറയുന്ന കാഴ്ചയാണ് കണ്ടത്. ആ രുചിയിലേക്ക് ഞങ്ങളും ഒഴുകിച്ചേർന്നു. ചോറും മീൻകറികളും മീൻ ഫ്രൈയുമാണ് ഇവിടത്തെ മെയിൻ. ചോറിനൊപ്പം ഉണക്കച്ചെമ്മീൻ ചമ്മന്തിയും ഇളമ്പക്കയും പിന്നെ പുളിമൂഞ്ചിയെന്ന മീൻകറിയും കിട്ടും. പുളിയും തേങ്ങാപ്പീരയും കൂടുതലായിച്ചേർത്തുണ്ടാക്കുന്ന മീൻകറിയാണ് പുളിമൂഞ്ചി. ഒപ്പം ഫിഷ് ഫ്രൈയും ആകാം.

മീൻരുചി പലവിധം