അങ്കോർവാട്ടിലെ വിശ്വവിസ്മയങ്ങൾ

ഭരണകൂടഭീകരതയുടെയും മനുഷ്യരാശിയെ നടുക്കിയ കൂട്ടക്കൊലകളുടെയും ചരിത്രം മാത്രമല്ല കംബോഡിയയ്ക്കുള്ളത്. ഭാരതീയസംസ്കാരവും വിശ്വാസങ്ങളുമായും ചേർന്നുകിടക്കുന്ന പാരമ്പര്യവും മഹത്തായ വാസ്തുശില്പവിസ്മയങ്ങളും ഇവിടെ സഞ്ചാരിയെ കാത്തിരിക്കുന്നു

- M G SASIBHOOSHAN

ലോകത്തിലെ ഏറ്റവും വിസ്തൃതമായ ക്ഷേത മെന്നു വിശേഷിപ്പിക്കാറുള്ള അങ്കോർ വാട്ട് കാണാൻ പുറപ്പെട്ടത് ക്വലാലംപുരിലെ എയർപോർട്ടിൽ നിന്നാണ്. രണ്ടുമണിക്കൂർ വേണ്ടിവന്നില്ല, കംബോഡിയയുടെ തലസ്ഥാനമായ നോംപനിലെത്താൻ. പിറ്റേദിവസമാണ്, അങ്കോർ വാട്ട് ക്ഷേത്രവും തൊട്ടടുത്തുള്ള ഖെമർ ദേവാലയങ്ങളും സ്ഥിതിചെയ്യുന്ന സിയെറീപ്പിലേക്ക് തിരിച്ചത് സിയാറിപ്പെന്നാൽ 'സയാമിനെ തോൽപ്പിച്ച സ്ഥലം എന്നാണർഥം. പതിനഞ്ചാം നൂറ്റാണ്ടിലായിരുന്നു കംബോഡിയൻ ജനതയ്ക്ക് അഭിമാനം പകർന്ന ആ യുദ്ധം നടന്നത്.

നെൽപ്പാടങ്ങളും വാഴത്തോപ്പുകളും മാവിൻ തോട്ടങ്ങളും കാർഷികഭവനങ്ങളും ഇടകലർന്ന ചെറുഗ്രാമങ്ങൾ പിന്നിട്ടായിരുന്നു. 389 കി.മീ. അകലെയുള്ള സിയെറീപ്പി ലേക്കുള്ള ഞങ്ങളുടെ കാർ യാത്ര. ഡ്രൈവർ ചീയായുടെ അടുത്തുള്ള സീറ്റിലിരുന്ന്, മോം വണക്ക് എന്ന ടൂർ ഗൈഡ്, കംബോഡിയയുടെ ഗതകാലചരിത്രവും വർത്തമാനകാലവിശേഷങ്ങളും പറഞ്ഞു. സിംഹതുല്യനായ നരോത്തമനാണ് തങ്ങളുടെ പഴയ രാജകുമാരനും പിന്നീട്  പ്രധാനമന്ത്രിയുമായിരുന്ന നരോത്തം സിഹാനൂക്ക് എന്നറിയിക്കാനും അയാൾ മറന്നില്ല. സിഹാറൂക്കിന്റെ മകനായ നരോദം സിംഹ മോണി(സിംഹമുനി)യാണ് ഇപ്പോഴത്തെ രാജാവ്.

ക്രിസ്തുവർഷാരംഭം മുതൽ തെന്നിന്ത്യൻ സംസ്കാരവുമായും പശ്ചിമേന്ത്യൻ വിശ്വാസങ്ങളുമായും കംബോഡിയക്കുള്ള ആത്മബന്ധത്തെക്കുറിച്ചും അയാൾ പറഞ്ഞു. ഇന്ത്യയിൽ നിന്നു പോയ കച്ചവടക്കാരും അവരെ സഹായിക്കാൻ കൂടെയുണ്ടായിരുന്ന ബ്രാഹ്മണരും പോരാളികളുമാണ്, കംബോഡിയക്കാരെ രാഷ്ട്രവ്യവഹാരവും ഹിന്ദുമതവും പഠിപ്പിച്ചത്. ഇന്ത്യയിൽ നിന്നെത്തിയ രാജകുമാരന്മാർ ഉൾപ്പെടെയുള്ളവർ കംബോഡിയൻ യുവതികളെ വിവാഹം കഴിക്കുകയും അങ്ങനെയുണ്ടായ സങ്കരജനത പുതിയ സംസ്കാരത്തിന്റെ പ്രചാരകന്മാരായി മാറുകയുമായിരുന്നു. എട്ടുമുതൽ പന്ത്രണ്ടാം നൂറ്റാണ്ടുവരെയുള്ള കാലമായിരുന്നു ഖെമർ കലയുടെ സുവർണകാലം. അങ്കോർ വാട്ടുപോലെയുള്ള മഹാ ക്ഷേത്രങ്ങളും അങ്കോർതോം പോലുള്ള രാജകീയനഗരങ്ങളും ഇക്കാലത്ത് രൂപം കൊണ്ടവയാണ്.