മഴവില്ലഴകിൽ നയാഗ്ര

 ന്യൂയോർക്കിൽനിന്നും ചെറുതടാകങ്ങളും മുന്തിരിത്തോട്ടങ്ങളും കാടും പിന്നിട്ട്, ആ മനോഹരവെള്ളച്ചാട്ടത്തിനരികിലേക്ക്. അമേരിക്കയെയും കാനഡയെയും ബന്ധിപ്പിക്കുന്ന നയാഗ്രയുടെ ഭാവപ്പകർച്ചകളിലേക്ക്..

- TEXT & PHOTOS: SHAN VILAKKATH

ട്രംബുളിൽനിന്നും ന്യൂയോർക്കിലേക്ക് പോകുന്ന പാതയുടെ ഇരുവശങ്ങളിലുമായി ഇടതൂർന്നു നിൽക്കുന്ന മരങ്ങൾ കണ്ട് ലിമോ ഡ്രൈവറോട് “നമ്മൾ കാടിനുള്ളിലൂടെയാണോ പോകുന്നത്'' എന്ന് ചോദിക്കേണ്ടിവന്നു. അമേരിക്കയിൽ ജനവാസം ഇല്ലാത്ത മേഖല ഇങ്ങനെയാണെന്നായിരുന്നു മറുപടി. ഏകദേശം രണ്ട് മണിക്കൂറിനുള്ളിൽ ന്യൂയോർക്കിലെ ഫ്ളഷിങ്ങിലെത്തി. അവിടെ നേരത്തെ ബുക്ക് ചെയ്ത ടൂർ ഓപ്പറേറ്ററുടെ ബസ് കിടപ്പുണ്ടായിരുന്നു. യാത്ര തുടങ്ങിയപ്പോൾ ഒരു സംശയം, ഈ ബസിലായിരിക്കുമോ ഇനിയുള്ള മണിക്കൂറുകൾ യാത്ര ചെയ്യേണ്ടത്. “ഇത് വെറും പിക്കപ്പ്, മാൻഹാട്ടനിൽ നിന്നാണ് ബസ് പുറപ്പെടുക''- ഡ്രൈവർ പറഞ്ഞു. ന്യൂയോർക്ക് നഗരം തിരക്കിലേക്ക് വഴുതി വീഴുന്ന പ്രഭാതമായിരുന്നു ഫ്ളഷിങ് മുതൽ മാൻ ഹാട്ടൻ വരെ കണ്ടത്. അമേരിക്കയിൽ ഒരു ചൈനയുണ്ടെങ്കിൽ അത് മാൻഹാട്ടൻ ആണ്. അവിടെയെല്ലാം  ചൈനീസ് മയമാണ്.

പലരാജ്യങ്ങളിൽനിന്നുള്ള യാത്രികർ ബസിലുണ്ടായിരുന്നു. ന്യൂയോർക്ക് എന്ന മഹാനഗരം പിന്നിട്ടുകഴിഞ്ഞാൽ പാതയ്ക്കിരുവശവും കാനനസൗന്ദര്യം പ്രത്യക്ഷമാവും. മണിക്കൂറുകൾ നീണ്ട യാത്ര അവസാനിച്ചത് കോണിങ് ഗ്ലാസ് മ്യൂസിയത്തിന് മുന്നിലായിരുന്നു. ചില്ലുകളാൽ തീർത്ത മനോഹരശില്പങ്ങളാലും കലാരൂപങ്ങളാലും അലങ്കൃതമായിരുന്നു മ്യൂസിയം, സഹസ്രാബ്ദകാലത്തോളം പഴക്കമുള്ള ഗ്ലാസ് ചരിത്രത്തിലേക്ക് വിരൽചൂണ്ടുന്ന ചില്ലു ശേഖരം നമ്മെ ഭ്രമിപ്പിക്കും. കല, ചരിത്രം, ശാസ്ത്രം, രൂപ കല്പന, ഉത്പാദനം എല്ലാം സമന്വയിപ്പിച്ച കോണിങ് ഗ്ലാസ് മ്യൂസിയത്തിലെ കാഴ്ചകൾ ഒരു സ്ഫടികവിസ്മയമാണ്.