ദേവഭൂമിയിലെ അദൃശ്യപക്ഷിയെത്തേടി

ഹിമാലയൻ മലനിരകളിൽ വസിക്കുന്ന അത്യപൂർവപക്ഷിയെ തേടിയുള്ള യാത്ര. കൊടുംമഞ്ഞിൽ ദുർഘടമായ പാതകൾ പിന്നിട്ട് ട്രാഭഗാപാനെ തിരയുന്ന യാത്രിക. അദൃശ്യസാന്നിധ്യമായ പക്ഷിയെ കാണാതെ തിരിച്ചുമടങ്ങിയ ദിനങ്ങൾ. ഒടുവിലതാ കൺമുന്നിൽ വർണപ്പക്ഷിയെ കാണാനായതിന്റെ സന്തോഷം...

- G SHAHEED

ഹിമാലയത്തിലെ അജ്ഞാതമായ ഉൾവനങ്ങളിലെവിടെയോ ഒരു അത്യപൂർവപക്ഷിയുണ്ട്. ആകാശത്തെ കൈതൊടാൻ കഴിയുന്ന ഉയരത്തിലുള്ള കാട്ടു പാതകളിലൂടെ നടക്കണം ഇവയെ കണ്ടെത്താൻ. മൂടൽമഞ്ഞിന്റെ കട്ടിയുള്ള വലയം ഒഴുകിയെത്തുമ്പോൾ കാഴ്ച മങ്ങും. ക്ഷമയോടെ കാത്തുനിൽക്കണം. ചുറ്റും നോക്കിയാൽ മഞ്ഞുമലകൾ. അങ്ങിങ്ങായി പച്ചത്തുരുത്തുപോലെ വനങ്ങൾ. താഴ്ന്നു പറക്കുന്ന മേഘങ്ങൾ. ചിലപ്പോൾ ആഞ്ഞുവീശുന്ന ശീതക്കാറ്റ്,

 ദൈവത്തിന്റെ സൃഷ്ടിയായ ആ വർണപ്പക്ഷിയെത്തേടിയാണ് ഈ തീർഥയാത്ര. “കടുംചുവപ്പുനിറത്തിലായിരിക്കും അവ. അദൃശ്യപക്ഷിയാണിത്. വിരലിലെണ്ണാവുന്നവർ മാത്രമാണ് പക്ഷിയെ കണ്ടിട്ടുള്ളത്. ജാഗ്രതയോടെ വേണം കാട്ടിലൂടെ നടക്കാൻ. ഹിമാലയൻ കറുത്ത കരടി ചിലപ്പോൾ പാഞ്ഞടുത്തേക്കാം. പക്ഷേ, പേടിക്കേണ്ടതില്ല, സുരക്ഷയ്ക്ക് കൂടെ ആളുകളുണ്ട്''-പക്ഷി നിരീക്ഷകരെ നയിക്കുന്ന വനംവകുപ്പിലെ ഗൈഡ് പറഞ്ഞു.

പക്ഷിയുടെ പേര് വെസ്റ്റേൺ ടാഗോപാൻ (Western Tragopan). ഗ്രേറ്റ് ഹിമാലയൻ നാഷണൽ പാർക്കിലാണ് പക്ഷികളുള്ളത്. ഉത്തരാഖണ്ഡിൽ ഏതാനും പക്ഷികളെ കണ്ടിട്ടുണ്ട്. കുറച്ചുദൂരം മാത്രം അപൂർവമായി പറക്കുന്ന ഇവ മറ്റുസമയങ്ങളിലെല്ലാം അടിക്കാടുകളിൽ ഒളിച്ചിരിക്കുകയാണ് പതിവ്. ഭാരിച്ച ക്യാമറകളുമായി പക്ഷികളെത്തേടി ഭൂഖണ്ഡങ്ങൾ പിന്നിട്ടിട്ടുള്ള മലയാളിയായ ഡോ. ജെയ്നി മരിയ കുര്യാക്കോസാണ് ഈ പക്ഷിയെത്തേടിയിറങ്ങിയത്.

അതീവ ദുഷ്കരമായ യാത്രയായിരുന്നു അത്. പുലർച്ചെ മൂന്നിന് പുറപ്പെടണം. കൂട്ടിന് ടോർച്ചുവെളിച്ചം മാത്രം. നാലുമണിയാകുമ്പോഴേക്കും പ്രകാശരശ്മികൾ മലമുകളിൽ വീണുതുടങ്ങും. അടിക്കാടുകൾ സൂക്ഷ്മമായി നോക്കിയാണ് യാത്ര.

കൺമുന്നിലെ വർണജാലം