ചിന്നാറിലെ വന്യലോകം

ചിന്നാറിൽനിന്ന് കൂട്ടാറിലേക്കുള്ള യാത്ര കാടിന്റെ മായാലോകം തുറന്നുതരും. കൊമ്പുകുലുക്കി പായുന്ന കാട്ടുപാത്താഭയാ മാനംനോക്കി കിടക്കുന്ന തവളവായൻ കിളിയായോ നക്ഷത്രയാമയുടെ രൂപത്തിലോ ആ കാഴ്ചകൾ കൺമുന്നിൽ വിടരും

- SREEJITH R

തൊട്ടടുത്ത് ജാലകത്തിനോടു ചേർന്ന് ഒത്ത ഒരു കൊമ്പൻ. അവൻ വളരെ ശാന്തനായി, ഊർജസ്വലതയോടെ പുല്ല് തിന്നു കൊണ്ട് നിൽക്കുന്നു. പെൻഡുലം ക്ലോക്കുപോലെ താളാത്മകമായിരുന്നു അവന്റെ ചെവി അടിക്കുന്ന ശബ്ദം, പൂച്ച കുറുകുന്ന പോലെ അവന്റെ കുറുകലും, തുമ്പിക്കൈ കൊണ്ട് ഒന്നിച്ച് പിഴുത ഒരുകൂട്ടം പുല്ലുകൾ മെല്ലെ സ്വന്തം കാലിൽ അടിച്ച് മണ്ണുകളഞ്ഞ് വായിലിട്ട് ചവയ്ക്കുന്ന ശബ്ദവും വ്യക്തമായി കേൾക്കാം. അത്ര അടുത്താണ് അവന്റെ നിൽപ്പ്. ഒന്ന് തിരിഞ്ഞാൽ കൊമ്പുകൊണ്ട് തകരാനുള്ള അകലം മാത്രമേ എനിക്കും അവനും ഇടയിലുള്ള ജനലിന് ഉണ്ടായിരുന്നുള്ളൂ. ഒച്ച ഉണ്ടാക്കിയാൽ, വെളിച്ചം വീണാൽ അവൻ സ്ഥായീഭാവം കൈവെടിഞ്ഞങ്കിലോ എന്നോർത്ത് ഫോട്ടോ എടുക്കാനുള്ള ഉദ്യമം ഉപേക്ഷിച്ചു. അവന്റെ മനോഹരചേഷ്ടകൾ തടസ്സമില്ലാതെ നിലാവെളിച്ചത്തിൽ കണ്ടുകിടക്കാനായിരുന്നു എനിക്കും ഇഷ്ടം. ചിന്നാർ വന്യജീവി സങ്കേതത്തിലെ ഒരിക്കലും മറക്കാത്ത ഒരു രാത്രിയോർമ

 അഞ്ചുനാടിന്റെ കിഴക്കൻ ചെരുവിൽ മഴനിഴൽ കാടുകളിൽ പ്രകൃതി ഒളിപ്പിച്ച കാണാക്കാഴ്ചകൾ തേടി ഇടയ്ക്ക് പോകാറുണ്ട്. ശിലായുഗ സംസ്കാരത്തിന്റെ തിരുശേഷിപ്പുകളായി നന്നങ്ങാടികളും, ഗുഹാമനുഷ്യന്റെ ഭാവനയിൽ വിരിഞ്ഞ കല്പിത കഥാപാത്രങ്ങളുടെയും വന്യ ജീവികളുടെയും രേഖാചിത്രങ്ങളും അദ്ഭുതപ്പെടുത്തുന്ന അടയാളങ്ങളായി ഇന്നും അവശേഷിക്കുന്നു. ഒപ്പം അതിലും ആശ്ചര്യപ്പെടുത്തുന്ന എത്രയോ അധികം ജീവികളും ഈ വരണ്ട കാടുകളിലേക്ക് എന്നും സ്വാഗതം ചെയ്തു കൊണ്ടേയിരിക്കുന്നു.

പക്ഷികളുടെ പറുദീസ

പ്രകൃതിസ്നേഹികളുടെ, പ്രത്യേകിച്ച് പക്ഷിനിരീക്ഷകരുടെ പറുദീസയാണ് ഇവിടം. മഴയൊഴിഞ്ഞ വരണ്ട മുൾക്കാടുകളും മൂന്നാറിൽ നിന്ന് കുളിർവാഹിയായി ഒഴുകുന്ന പാമ്പാറും ചിന്നാറും കൂട്ടാറും തീർക്കുന്ന പച്ചപ്പിന്റെ ഇടനാഴികളും ഒത്തൊരുമിക്കുന്ന വിസ്മയലോകം. അവിടെ നിറങ്ങൾ വാരിപ്പൂശിയ എത്രയെത്രതരം പക്ഷികൾ, ശലഭങ്ങൾ, ജന്തുജാലങ്ങൾ. എപ്പോൾ വന്നാലും എന്തെങ്കിലും പുതുമ നൽകി അനുഗ്രഹിക്കുന്ന സ്വഭാവം ഈ കാടിനുള്ളതായി തോന്നിയിട്ടുണ്ട്. ഇത്തവണയും അവൾ നിരാശപ്പെടുത്തിയില്ല.