വേറിട്ടൊരു ശ്രീരാമൻ

കുന്നംകുളത്തിനടുത്ത് ചെറുവത്താനിയിൽ ഒരു വീടുണ്ട്. ആ വീട്ടിൽ കൊതിപ്പിക്കുന്ന ജീവിതത്തിന്റെ ഉടമയായ ഒരു മനുഷ്യനുണ്ട്. നടൻ, എഴുത്തുകാരൻ, ദൃശ്യമാധ്യമ പ്രവർത്തകൻ... വി.കെ.ശ്രീരാമനെ വിശേഷണങ്ങളുടെ ചട്ടക്കൂടിൽ ഒതുക്കുന്നതെങ്ങനെ...

- വി. പ്രവീണ

കെട്ടുപിണഞ്ഞ വേരുപോലെ വഴി. ഇടവഴി കയറുമ്പോൾ ഇടവപ്പാതി ഇടറിത്തുടങ്ങി. മഴ തൊട്ടപ്പോൾ ഇക്കിളിപ്പെട്ടിട്ടാകാം ഇത്തിമരം തലകുടഞ്ഞു. മേഘം പൊട്ടിയടർന്നതോ, മരപ്പൊ. മഴക്കാറ്റിൽ മുറ്റത്തിന്റെ ഒരതിരിൽ നിന്ന മുളങ്കാട് ഉലഞ്ഞു. ഒരാൾപ്പൊക്കത്തിൽ മുളങ്കാടിനരികെ ഒരു മൂലയിൽ ഇടംപിടിച്ച ശില്പം ഗൗരവക്കാരനായൊരു സന്ന്യാസിയെപ്പോലെ മുഖത്തേക്ക് നോക്കുന്നു. കറക്കം നിലച്ചൊരു തടിച്ചക്രം അതിനരികിലുണ്ട്. മുളങ്കാടിനും ഇത്തിക്കും ഇടയിലായി വെളുത്തചായം പൂശി ശില്പിയും ചിത്രകാരനുമായ റോയ് ചൗധരിയുടെ ശില്പം. ഇലപ്പുതപ്പ് പുതച്ച വീടിന്റെ ഓടുപാകിയ മച്ചിനു താഴെ ഫ്രെയിമുകൾക്കുള്ളിൽ വി. കെ. എന്നും വിജയനും ഗോവിന്ദനും. ചുമരുകളോടു ചേർത്തടുക്കിയ പുസ്തകക്കൂട്ടങ്ങളിൽ ഉറങ്ങുന്നുണ്ട് പലകാലങ്ങളെ ഭ്രമിപ്പിച്ച പരശതം കഥാപാത്രങ്ങൾ.

വേറിട്ട കാഴ്ചകളിങ്ങനെ മാടി മാടിവിളിക്കുന്ന വീടിന്റെ ഉമ്മറത്തിരുന്ന് വി. കെ. ശ്രീരാമൻ ജീവിതം പറയാൻ തുടങ്ങി. മുന്നിലെ കടലാസിൽ അതിനിടെ പിറന്നു തികവുറ്റൊരു രേഖാചിത്രം. മഴ പിന്നെയും പൊഴിഞ്ഞു. ആ മഴയുടെ കൈപിടിച്ച് ബി. സി 53 -ലേക്ക്. പ്രവാസവും ഗുണ്ടായിസവും സിനിമയും സൗഹൃദവും ജീവിതം സമ്പന്നമാക്കിയ ഇതരവാഴ്വുകളും നിറഞ്ഞ ഒട്ടേറെ വർഷത്തെ ആഴമേറിയ അനുഭവങ്ങളിലേക്ക്... വി.കെ. ശ്രീരാമന്റെ വേറിട്ട ജീവിതത്തിലേക്ക്...

ബി. സി 53-ലെ ഞാറ്റുവേല