മഴത്തണുപ്പിൽ വീടിന് വേണം കരുതലേറെ

HomeCare

സുഖമുള്ള തണുപ്പിനൊപ്പം അഴുക്കും കൂടി വീട്ടിലേക്കെത്തുന്ന സമയമാണ് മഴക്കാലം. ചുവരിലും തറയിലും വീട്ടുപകരണങ്ങളിലുമൊക്കെ പറ്റിപ്പിടിച്ചിരിക്കുന്ന ചെറിയ അഴുക്കുകൾ, അധികം കൈയെത്താത്ത മൂലകളിൽ വേനൽ ബാക്കിവെച്ച് പൊടി എന്നിവയൊക്കെ മഴക്കാലത്ത് ഈർപ്പം പറ്റി വലിയ ശല്യക്കാരാകാറാണ് പതിവ്. അവിടെ പൂപ്പലും ഫംഗസും വളരും. വീടു തന്നെ സൂക്ഷ്മജീവികളുടെ വളർത്തുകേന്ദ്രങ്ങളാവുമെന്നർഥം. തുമ്മലും ജലദോഷവും മറ്റ് അണുബാധകളുമൊക്കെ പിന്നാലെയെത്തുകയും ചെയ്യും. വില കൂടിയ നമ്മുടെ വീട്ടുപകരണങ്ങളും ഇലക്ട്രിക് ഉപകരണങ്ങളുമെല്ലാം പൂപ്പലും നനവും കാരണം കേടുവരാനും സാധ്യതയേറെ.. മഴക്കാലത്ത് വീട്ടകം സുരക്ഷിതമാക്കാൻ ചില പൊടിക്കൈകളിതാ..

കാർപ്പറ്റ്

വീട്ടിനുള്ളിലേക്കെത്താതെ അഴുക്കിനെ ചെറുത്ത് സ്വയം ഏറ്റുവാങ്ങുന്നവരാണ് ഉമ്മറത്തും പിറകിലെ വാതിൽപ്പടിയിലുമിടുന്ന ചവിട്ടികൾ. അതുകൊണ്ട് അവ അപ്പപ്പോൾ തന്നെ സോപ്പുപയോഗിച്ച് വൃത്തിയാക്കുക തന്നെ വേണം. ചെളിപിടിച്ച ചവിട്ടികളിൽ പെട്ടെന്ന് പൂപ്പൽ വരാനും ദുർഗന്ധം വമിക്കാനുമിടയുണ്ട്.

അതുവഴി രോഗാണുക്കൾ വീടിനുള്ളിലേക്കെത്താനും. നനഞ്ഞ ചവിട്ടികൾ പെട്ടെന്ന് തന്നെ മാറ്റിയിടുകയോ ഉണക്കിയെടുക്കുകയോ വേണം. എളുപ്പം ഉണങ്ങാത്തതും ചെളിപിടിക്കുന്നതുമായ തുണിയുടെയും ജൂട്ടിന്റെയും ചവിട്ടികൾ മഴക്കാലത്ത് ഒഴിവാക്കാം. പകരം പ്ലാസ്റ്റിക്, റബർ കാർപ്പറ്റുകളുപയോഗിക്കാം. പെട്ടെന്ന് വൃത്തിയാക്കാനും ഉണങ്ങാനും ഇതാണു നല്ലത്. മുഷിയാനിടയുള്ളതിനാൽ വിലകൂടിയ കാർപറ്റുകൾ മഴക്കാലത്ത് ഒഴിവാക്കാം.