ഒന്നും പ്രതീക്ഷിക്കുന്നില്ല അതാണെന്റെ ഫിലോസഫി

ചെയ്ത റോളുകളുടെ എണ്ണമെടുത്താൽ വളരെ കുറവ്. പക്ഷേ, ചെയ്തതത്രയും മികച്ചതും. ആ മികവിന്റെ പാതയിൽ അപർണ ബാലമുരളിയെ തേടി മികച്ച നടിക്കുള്ള ദേശീയ പുരസ്കാരവുമെത്തി...

- കെ. വിശ്വനാഥ്

നിനച്ചിരിക്കാതെ സിനിമയിലെത്തിയ അഭിനേത്രിയാണ് അപർണ ബാലമുരളി. മഹേഷിന്റെ പ്രതികാരത്തിലൂടെ നടിയെന്ന പേരുറപ്പിച്ച അപർണയെ തേടി 26-ാം വയസ്സിൽത്തന്നെ ദേശീയ അവാർഡുമെത്തി. അതും സൂര്യയെന്ന സൂപ്പർ താരത്തിനൊപ്പം ലീഡ് റോളിൽ അഭിനയിച്ച് കൂടുതലൊന്നും ആഗ്രഹിക്കാത്ത, അതേസമയം ധാരാളം സ്വപ്നങ്ങൾ കാണുന്ന തനി തൃശ്ശൂരുകാരി പെൺകുട്ടി ഗൃഹലക്ഷ്മിയോട് മനസ്സു തുറക്കുന്നു.

രാജ്യത്തെ മികച്ച നടിക്കുള്ള പുരസ്കാരമൊക്കെ കിട്ടുന്ന ഒരു നടിയായി മാറുമെന്ന് എപ്പോഴെങ്കിലും സ്വപ്നം കണ്ടിരുന്നോ? നടിയാവുമെന്ന് പോലും കരുതിയിരുന്നില്ല. ശരിക്കും ഒരു ധാരണയുമില്ലാതെയാണ് “മഹേഷിന്റെ പ്രതികാരത്തിൽ അഭിനയിക്കുന്നത്. അതിനു ശേഷമാണ് എനിക്ക് ഇത് ചെയ്യാൻ പറ്റുമെന്ന് തന്നെ മനസ്സിലായത്. ആ സിനിമ റിലീസായതോടെ കൂടുതൽ നന്നായി ചെയ്യണം എന്നൊരു ആഗ്രഹമൊക്കെ ഉണ്ടായി. പക്ഷേ, അന്നും സിനിമയേയും അഭിനയത്തേയും കുറിച്ച് എനിക്ക് ചെറിയ അറിവേ ഉണ്ടായിരുന്നുള്ളൂ. കാരണം, ഞാൻ ധാരാളം സിനിമ കാണുന്ന ആളായിരുന്നില്ല. ആക്ടിങ് സ്കൂളിൽ പോവുകയോ വർക്ഷോപ്പുകളിൽ പങ്കെടുക്കുകയോ ചെയ്തിട്ടില്ല. അതിന്റെയൊക്കെ പരിചയക്കുറവ് ഉണ്ടായിരുന്നുതാനും. “മഹേഷിന്റെ പ്രതികാരവും "സൺഡേ ഹോളിഡേ'യും കഴിഞ്ഞപ്പോൾപ്പോലും എനിക്ക് എന്റെ പൊട്ടെൻഷ്യൽ തെളിയിക്കാൻ കഴിഞ്ഞില്ല എന്ന തോന്നലുണ്ടായിരുന്നു.

"മഹേഷിന്റെ പ്രതികാരം' കണ്ടിട്ട് സുധാ കൊങ്ങര എന്നെ വിളിച്ചപ്പോൾ വലിയ ഭാഗ്യമായി തോന്നി. കാരണം പല സംവിധായകരും ഓരോ അഭിനേതാക്കളുടെ ആദ്യ സിനിമകളിലെ പെർഫോമൻസ് കണ്ടാണ് അവരെ വലിയ സിനിമകളിലേക്ക് വിളിക്കുക. അതുകൊണ്ട് എനിക്ക് പ്രതീക്ഷ ഉണ്ടായിരുന്നില്ല. പക്ഷേ, സുധാ മാം "സുര പോടിലെ നായികയുടെ വേഷത്തിലേക്ക് എന്നെ ഉറപ്പിച്ചിരുന്നു. ഞാൻ നന്നായി വർക്ക് ചെയ്താൽ എനിക്ക് ആ കഥാപാത്രത്തിലേക്ക് എത്താൻ കഴിയുമെന്ന് സുധാ മാം വിശ്വസിച്ചു. ആ വിശ്വാസത്തിന്റെ പുറത്താണ് എനിക്ക് ആ സിനിമ ചെയ്യാനും ദേശീയ അവാർഡ് നേടാനും കഴിഞ്ഞത്.

സിനിമയിൽ എത്തും മുമ്പ് ആരായിരുന്നു അപർണ