പേവിഷബാധ അറിയാം, തടയാം

കടിയേറ്റാൽ പ്രഥമശുശ്രൂഷയാണ് പ്രധാനം . കുത്തിവെപ്പിനെക്കുറിച്ചും അതിന്റെ അളവിനെക്കുറിച്ചുമെല്ലാം അറിഞ്ഞാൽ പേവിഷബാധ ഗുരുതരമാകാതെ തടയാം

- പി. വി. സുരാജ്

റാബിസ് അഥവാ പേവിഷ ബാധ ഒരു മൃഗജന്യ രോഗമാണ്.  ലൈസ വർഗത്തിൽപ്പെട്ട റാബിസ് വൈറസാണ് പേവിഷബാധയുണ്ടാക്കുന്നത്. മൃഗങ്ങളിൽ നിന്ന് മൃഗങ്ങളിലേക്ക് ഇവ വേഗം പടരും. പേവിഷബാധയുള്ള മൃഗങ്ങളുടെ ഉമിനീർ ചെറുമുറിവുകളിലൂടെയും മ്യൂകോസ് എന്ന ശ്ലേഷ്മ ചർമത്തിലൂടെയും മനുഷ്യശരീരത്തിൽ കടക്കുന്നു. ഇത് നാഡീഞരമ്പുകളിലൂടെ തലച്ചോറിലെത്തി നീർവീക്കം ഉണ്ടാക്കുകയും ഹൃദയസ്തംഭനം, ശ്വാസതടസ്സം എന്നീ ഗുരുതര പ്രശ്നങ്ങൾക്ക് കാരണമാവുകയും ചെയ്യും. അങ്ങനെയാണ് മരണം സംഭവിക്കുന്നത്.

മുറിവുകളുടെ എണ്ണം, ആഴം, വലിപ്പം, മുറിവേറ്റ ഭാഗം, കടിച്ച മൃഗത്തിന്റെ രോഗാവസ്ഥ ഇവ അനുസരിച്ചാണ് രോഗപ്പകർച്ച ഉണ്ടാകുന്നത്. കൂടുതൽ  നാഡീവ്യൂഹമുള്ള മുഖത്തും കണ്ണിലും ഗുഹ്യഭാഗങ്ങളിലുമെല്ലാം കടിയേറ്റാൽ വളരെവേഗം അണുക്കൾ തലച്ചോറിലെത്താൻ സാധ്യതയുണ്ട്.

മനുഷ്യരിൽ പ്രധാനമായി പട്ടികടിമൂലമാണ് (96%) പേവിഷബാധയുണ്ടാകുന്നത്. പൂച്ച, കുറുക്കൻ, കുരങ്ങ് എന്നിവയുടെ കടിയേറ്റാലും പേവിഷബാധയുണ്ടാകും. എന്നാൽ എലി, മുയൽ, അണ്ണാൻ എന്നീ കരണ്ടുതീനികൾ രോഗകാരികളല്ല.

ലക്ഷണങ്ങള്‍

കടിയേറ്റാല്‍ മൂന്നുമുതല്‍ എട്ട്‌ ആഴ്ചകള്‍ക്കുള്ളില്‍ ലക്ഷണങ്ങള്‍ പ്രകടമാകും.

കടിയേറ്റ ഭാഗത്ത്‌ ചെറിയ തരിപ്പും ചൊറിച്ചിലും കണ്ടേക്കാം. തലവേദന, ഛര്‍ദി തുടങ്ങിയ ലക്ഷണങ്ങളും ഉണ്ടാവാം.

പേവിഷബാധയേറ്റ ഭൂരിഭാഗം പേരിലും മസ്തിഷ്‌കജ്വരം കാണാറുണ്ട്‌.

കഴുത്തിലെ പേശികള്‍ വലിഞ്ഞുമുറുകുന്നതു മൂലം വെള്ളം കുടിക്കാന്‍ കഴിയാത്ത അവസ്ഥയുണ്ടാകും.

ശബ്ദം, പ്രകാശം എന്നിവയോട്‌ അസ്വസ്ഥത പ്രകടിപ്പിച്ചേക്കാം.

ഫസ്റ്റ് എയ്ഡ്

മുറിവേല്‍ക്കുമ്പോള്‍ ശരീരത്തിലെത്തുന്ന അണുക്കള്‍ അവിടെ പെരുകി നാഡികളിലൂടെ വളരെവേഗം തലച്ചോറിലെത്താം. അതിനാല്‍ കാലതാമസം കൂടാതെ പ്രാഥമികശുശ്രൂഷ സ്വീകരിക്കണം.

കടിയേറ്റ ഭാഗം തുറന്ന ടാപ്പിനടിയില്‍ വെച്ച്‌ പത്തോ പതിനഞ്ചോ മിനിറ്റ്‌ നന്നായി കഴുകുക. കടിയേറ്റ കാര്യം ദിവസങ്ങള്‍ കഴിഞ്ഞാണ്‌ അറിയുന്നതെങ്കിലും ഇങ്ങനെ കഴുകണം.