ജീവിതം 'അഡ്ജസ്റ്റ് ചെയ്യുന്നവൾ

സ്ത്രീജീവിതത്തിൽ സമൂഹം സ്വാഭാവികമെന്ന് കരുതുന്ന ഒന്നാണ് അഡ്ജസ്റ്റ്മെന്റ്. പക്ഷേ, എന്തിനോടൊക്കെ ഏതളവിൽ അഡ്ജസ്റ്റ് ചെയ്യണമെന്ന കാര്യത്തിൽ തീരുമാനങ്ങളെടുക്കുന്നത് ആരാണ്?

- ആർ. രാജശ്രീ

വിവാഹാനന്തരജീവിതത്തിന്റെ നിഘണ്ടുവിലെ ആദ്യത്തെ യും അവസാനത്തെയും  വാക്കാണ് അഡ്ജസ്റ്റ്മെന്റ്.  അത് സ്വാഭാവികമായിത്തന്നെ നാം ഏറ്റവും അംഗീകരിച്ചു പോന്നിട്ടുണ്ട്. പക്ഷേ, എന്തിനോടൊക്കെ ഏതളവിൽ അഡ്ജ സ്റ്റ് ചെയ്യണമെന്ന കാര്യത്തിൽ തീരുമാ നങ്ങളുണ്ടാവുന്നത് എവിടെ നിന്നാണ്? മിക്കവാറും ഈ അഡ്ജസ്റ്റ്മെന്റ് വിവാഹത്തിനു മുമ്പേ തുടങ്ങുന്ന ഒന്നാണെന്നു കാണാം. പെൺകുട്ടികൾക്ക് ഇണയെ തെരഞ്ഞെടുക്കാനുള്ള അവകാശമോ തീരുമാനങ്ങളെടുക്കാനുള്ള സ്വാതന്ത്ര്യമോ ഇല്ലാത്ത ഒരു സമൂഹത്തിൽ ഇത് കൃത്യമായ കീഴടങ്ങലാണ്. നേരത്തേ നാം സൂചിപ്പിച്ച, ഭാവി വരന്റെ വീട്ടിലെ അസൗകര്യങ്ങളെക്കുറിച്ച് ആകുലയായ കൂട്ടുകാരിയോട് (തൽക്കാലം നമുക്കവളെ സുചിത്ര എന്നു വിളിക്കാം) അഡ്ജസ്റ്റ് ചെയ്താൽ മതിയെന്നാണ് സ്വന്തം വീട്ടുകാർ നിർദേശിച്ചത്. വരന്റെ വീട്ടിൽ അവൾ കിണറ്റിൽ നിന്ന് വെള്ളം കോരി തുക്കിയെടുത്ത് അടുക്കളയിൽ കൊണ്ടു ചെന്നു വെക്കുകയും മുറ്റത്ത് കുന്തിച്ചിരുന്ന് പാത്രം കഴുകുകയും ചെയ്തു. വിവാഹം പ്രമാണിച്ച് അവളുടെ സ്വന്തം വീട്ടിൽ പൈപ്പുകളും കിച്ചൺ സിങ്കും എത്തിയിരുന്നു. വരന്റെ വീട്ടിൽ രണ്ടു ബക്കറ്റ് വെള്ളത്തിൽ അഡ്ജസ്റ്റ് കുളിക്കുന്ന താൻ സ്വന്തം വീട്ടിൽ അതിഥിയായി ചെല്ലുമ്പോൾ ഷവറിനു താഴെ ഏറെ സമയം നില്ക്കാറുണ്ടെന്ന് അവൾ പറഞ്ഞു. ഭർത്താവിന്റെ ജോലി സ്ഥലത്തേക്ക് എങ്ങനെയും പോയാൽ മതിയെന്ന ഒറ്റ ലക്ഷ്യമേ അവൾക്കുണ്ടായിരുന്നുള്ളൂ. താൻ വരുന്നതുവരെ എങ്ങനെയാണ് അയാളുടെ വീട്ടിലെ ജോലികൾ നടന്നിരുന്നതെന്ന് അവൾ പല്ലുകടിച്ചു. പരാമർശം പോലുമർഹിക്കാത്ത നിസ്സാരവിഷയങ്ങളായതിനാൽ അവളുടെ അമ്മ, അച്ഛനോടോ മറ്റു ബന്ധുക്കളോടോ അതൊന്നും പങ്കുവച്ചില്ല. കോഴിക്കറിയിലെ കഴുത്തുഭാഗം, പഴകിയതോ ചീത്തയായിത്തുടങ്ങിയതോ ആയ ഭക്ഷണം, പ്രാതലിലെ മിച്ചം വന്ന വകകളെല്ലാം ഒന്നിച്ചിട്ടുള്ള അത്താഴം തുടങ്ങിയവ തനിക്ക് ശരിയാകുന്നില്ലെന്ന് അവൾ ഞങ്ങളോട് കണ്ണുതുടച്ചു. ഒരു വിധത്തിൽ ഭർത്താവിന്റെ ജോലിസ്ഥലത്തെ ഒറ്റമുറിയിലേക്കുള്ള പറിച്ചുനടൽ അവളുടെ ശാപമോക്ഷം കൂടിയായിരുന്നു. ആ മുറിയിലെ മണ്ണെണ്ണ സ്റ്റൗവിൽ അവൾ ദീർഘകാലം ഭക്ഷണമുണ്ടാക്കി. ഗ്യാസിലേക്ക് മാറിയ ദിവസം ജീവിതം അല്പം മെച്ചപ്പെട്ടതായി തോന്നിയെന്നും അവൾ പറഞ്ഞു.