സമരച്ചൂളയിലെ ഉഷക്കാലം

അതിക്രമത്തെ എതിർത്തതിന് തൊഴിലിടത്തിൽ നേരിടേണ്ടി വന്ന കടുത്ത അപവാദപ്രചരണങ്ങൾ. പ്രതിരോധിക്കുന്ന സ്ത്രീയെ തളർത്തുന്ന പൊതുബോധത്തി നെതിരെ പി.ഇ. ഉഷ പോരാട്ടം തുടരുന്നു...

- അപർണ എസ്. തമ്പി

1999: ഡിസംബർ 29. രാത്രി എട്ടുമണിയോടെ കോഴിക്കോട്ട് നിന്ന് ബസ്സിൽ യാത്ര ചെയ്യുകയായിരുന്നു സാമൂഹിക പ്രവർത്തകയും കാലിക്കറ്റ് സർവകലാശാലാ ജീവനക്കാരിയുമായ പി.ഇ. ഉഷ. ആ യാത്രയിൽ അവർ അതിക്രമത്തിനിരയായി. സംഭവശേഷം ഉഷയെ കാത്തിരുന്നത് കൊടിയ അപമാനവും അപവാദ പ്രചരണങ്ങളുമായിരുന്നു. ജോലി ചെയ്തിരുന്ന കാലിക്കറ്റ് സർവകലാശാലയിലെ എംപ്ലോയീസ് യൂണിയൻ അംഗം ഈ വിഷയത്തിൽ തനിക്കെതിരെ അപകീർത്തി പരത്തിയെന്നാരോപിച്ച് മേലുദ്യോഗസ്ഥർക്ക് ഉഷ പരാതി നൽകി. വിഷയം കത്തിപ്പടർന്നു. വനിതാ കമ്മീഷന്റെ അന്വേഷണത്തിൽ അപവാദ പ്രചരണം സ്ഥിരീകരിച്ചു. എന്നാൽ യൂണിയൻ ഇതിനെ ശക്തമായി പ്രതിരോധിച്ചു. നീതി തേടി ഉഷ നിരാഹാര സത്യാഗ്രഹമിരുന്നു. സർക്കാരിനെതിരെ സമരം നടത്തിയ ഉഷയ്ക്ക് ഉന്നതരുടെ ചരടുവലികൾക്കൊടുവിൽ സർവകലാശാലയുടെ പടിയിറങ്ങേണ്ടി വന്നു. തുടർന്ന് അട്ടപ്പാടി ഹിൽസ് ഏരിയാ ഡവലപ്മെന്റ് സൊസൈറ്റി (അഹാഡ്സ്)യിൽ ഡെപ്യൂട്ടേഷനിൽ ജോലി ചെയ്തു. അവിടെയും കാത്തിരുന്നു വെല്ലുവിളികൾ...ആരോപണങ്ങൾ...

‘കലാപകാരി', 'നക്സലൈറ്റ് എന്നിങ്ങനെയുള്ള വിശേഷണങ്ങൾ പ്രചരിപ്പിക്കപ്പെട്ടു. ആദിവാസികളുടെ ഉന്നമനത്തിനായുള്ള പ്രവർത്തനങ്ങളിൽ മുഴുകി ഉഷ അതിനെയൊക്കെയും അതിജീവിച്ചു. ബസ്സിലെ അതിക്രമവുമായി ബന്ധപ്പെട്ട് രഹസ്യ വിചാരണകളും സഹപ്രവർത്തകരുടെ കുത്തു വാക്കുകളുമൊന്നും ഉഷയെ പിന്നോട്ടടിച്ചില്ല. ധീരമായി പൊരുതി. ഉള്ളിൽ നീറിപ്പുകയുന്ന അഭിമാനബോധം അവരെ ഒരിക്കലും നിശ്ശബ്ദയാക്കിയില്ല.

അതിക്രമ കേസിലെ പ്രതിയെ കോടതി ശിക്ഷിക്കുകയും ചെയ്തു. ലജ്ജാകരവും മനുഷ്യത്വരഹിതവുമായ പ്രവർത്തിയാണ് പ്രതിയിൽ നിന്നുണ്ടായതെന്ന് മജിസ്ട്രേട്ട് വിധിന്യായത്തിൽ പറഞ്ഞു. ഇത്തരം കുറ്റകൃത്യങ്ങൾക്ക് പ്രതി പരമാവധി ശിക്ഷ അർഹിക്കുന്നതായി അഭിപ്രായപ്പെട്ട കോടതി സമാന സ്വഭാവക്കാർക്കുള്ള മുന്നറിയിപ്പാണ് ഈ ശിക്ഷയെന്നും അന്ന് വ്യക്തമാക്കി.

വർഷങ്ങളുടെ പഴക്കമുള്ള ഉഷയുടെ പോരാട്ടത്തിന് ഇന്നും മൂർച്ചയേറെയാണ്. പെൺപോരാട്ടങ്ങളോടുള്ള സമൂഹത്തിന്റെ കാഴ്ചപ്പാടുകളെക്കുറിച്ചു ഉഷ വാചാലയാകുന്നു...

പ്രതികരിക്കുന്ന സ്ത്രീ