ആശാന്റെ ചന്ദ്രിക

അരങ്ങിലെ വേഷങ്ങൾ അഴിച്ചുവച്ച് കലാമണ്ഡലം ഗോപി കഥ പോലൊരു ജീവിതം പറയുന്നു. ലഹരിയും രോഗങ്ങളും നിറഞ്ഞ കഥയുടെ ഏടുകളെ സ്നേഹത്താൽ തിരുത്തിയ ചന്ദ്രിക ഒപ്പമുണ്ട്.

- ദീപാ ദാസ്

ഹന്ത! ഹംസമേ, ചിന്തയെന്തു തേ
എന്നുടെ ഹൃദയം അന്യനിലാമോ?
അർണ്ണവം തന്നിലല്ലോ നിമ്നഗ ചേർന്നു ഞായം,
അന്യഥാ വരുത്തുവാൻ കുന്നു മുതിർന്നീടുമോ?

നളനോടുള്ള പ്രണയം ഹംസത്തോട് തുറന്നു പറയുകയാണ് ദമയന്തി. “നളചരിതം ഒന്നാം ദിവസത്തിലെ പ്രസിദ്ധമായ ഈ പദത്തിൽ, നളനോടുള്ള ദമയന്തിയുടെ പ്രണയത്തിന്റെ ആഴം കാണാം. പക്ഷേ, വർഷങ്ങൾക്കുമുൻപ് അരങ്ങിലെ നളനെ ആദ്യമായിക്കാണുമ്പോൾ, ചന്ദ്രികയുടെ സ്ഥിതി തീർത്തും വ്യത്യസ്തമായിരുന്നു. സുഖമില്ലാതെ കിടക്കുന്ന അച്ഛനെ കാണാൻ വന്ന അച്ഛൻ പെങ്ങളുടെ മകൻ മണാളത്ത് ഗോപി. ആദ്യമായിക്കാണുമ്പോൾ,  ചന്ദ്രികയ്ക്കറിയില്ലായിരുന്നു, കഥകളിപ്രിയരുടെ മനം കവർന്ന നളനാണയാളെന്ന്. . അയാൾ കലാകാരനാണെന്ന് കേട്ടിരുന്നു. ജീവിതത്തിൽ കഥകളി ഒരൊറ്റത്തവണയേ കണ്ടിട്ടുള്ളൂ. അതിലപ്പുറം വലിയ പരിചയമൊന്നുമില്ല. പിന്നെയെങ്ങനെ, ഈ നളനെക്കുറിച്ചറിയും... കഥകളിയരങ്ങിലെ നിത്യഹരിതനായകൻ കലാമണ്ഡലം ഗോപിയുടെ പ്രിയ കൂട്ടുകാരി ചന്ദ്രിക ഓർക്കുന്നു. കഥയിലെ വിട്ടുപോയ ഭാഗങ്ങൾ പൂരിപ്പിച്ച് ഒപ്പമുണ്ട് ഗോപിയാശാൻ.

തൃശ്ശൂരിനടുത്ത് പേരാമംഗലത്ത "ഗുരുകൃപ' എന്ന് പേരുള്ള വീട്. പുറംചുവരുകളിൽ നിരത്തിവെച്ചിട്ടുണ്ട് കുറെ ചിത്രങ്ങൾ; കഥകളിമുദ്രകൾ, ഭാവങ്ങൾ, പിന്നെയൊന്നിൽ മോഹൻലാലിനൊപ്പം മുദ്രയാടുന്നു ആശാൻ. ഇടതുവശത്തെ ഷെഡ്ഡിൽ ആശാന്റെ നവരസ ചിത്രങ്ങൾ. മുറ്റത്തേക്ക് ഇറക്കി പണിത മുറിയിലേക്ക് കടന്നപ്പോൾ, ചുവരലമാരകളിലും സ്റ്റാൻഡുകളിലും മറ്റുമായി പുരസ്കാരങ്ങളുടെ വൻ നിര ലഭിച്ച പുരസ്കാരങ്ങളുടെ പട്ടിക ഒരു വശത്ത്, വലിയ ബോർഡിൽ രേഖപ്പെടുത്തിവെച്ചിരിക്കുന്നു. ബാക്കിയുണ്ട്.

മുറിക്കുള്ളിലെ കാഴ്ചകൾ കണ്ട് അദ്ഭുതപ്പെട്ടു നിൽക്കെ പിന്നിൽനിന്ന് ഗാംഭീര്യം നിറഞ്ഞ ശബ്ദം: “നമസ്കാരം...”കൈകൾ കൂപ്പി സാക്ഷാൽ കലാമണ്ഡലം ഗോപി മുന്നിൽ. “ഇന്നലെ, പാലക്കാട് പല്ലാവൂർ ശിവക്ഷേത്രത്തിലായിരുന്നു കളി. കുചേലനായി. പുലർച്ചെ , രണ്ടരയായി തിരിച്ചെത്തിയപ്പോൾ. അതോണ്ട്, രാവിലെ എണീക്കാൻ അല്പം വൈകി. അവരും(ചന്ദ്രിക) വന്നിരുന്നു, ഇപ്പോൾ വരൂട്ടോ...', സൗഹൃദം നിറഞ്ഞ ശബ്ദത്തിൽ അദ്ദേഹം പറഞ്ഞു.