കണ്ടൽ കണ്ടുകണ്ട്

കണ്ടലുകളുടെ പച്ചക്കുടകൾ, പരദേശിപ്പറവകളുടെ മിന്നലാട്ടങ്ങൾ... കടലുണ്ടിപ്പുഴയുടെ കാഴ്ചകളിലേക്ക്

- അനന്യ. ജി

വേനൽപ്പുടവയുടുത്ത് മുന്നിലതാ കടലുണ്ടി പുഴ. പുഴയ്ക്കുകുറു കെയുള്ള ചെറുപാലം മുറിച്ചുകടന്ന് കടവിലേക്ക്. നീലയും ചുവപ്പും ചായം പൂശിയ, മേൽക്കൂര പിടിപ്പിച്ച ബോട്ട് കാത്തുകിടക്കുന്നു. ശിവദാസൻ എന്ന് സ്വയം പരിചയപ്പെടുത്തിയ ഡ്രൈവർ, നിർബന്ധമാണെന്ന മുഖവുരയോടെ ലൈഫ് ജാക്കറ്റ് കൈയിൽത്തന്നു. മുളങ്കോൽ പുഴയിലാഴ്ന്നപ്പോൾ ബോട്ടിന് ജീവൻവെച്ചു. ഓളങ്ങളിൽ ഇളകിയാടി അത് പതിയെ മുന്നോട്ട് സഞ്ചാരികളെക്കാണാൻ ഞണ്ടുകൾ മടയിൽനിന്ന് തലയിട്ടുനോക്കി. കുസൃതിക്കാരായ ചില മീനുകൾ പൊങ്ങിച്ചാടി സലാം പറഞ്ഞു.

ഒഴുകി... ഒഴുകി...

എണ്ണപടർത്തി പുഴ ചീത്തയാക്കണ്ട എന്നുകരുതി എൻജിൻ ഉപയോഗിക്കുന്നില്ല. പതിയെയാണ് ബോട്ടിന്റെ പോക്ക് കാണുന്നതെല്ലാം ഓർമ്മയിലേക്കൊപ്പിയെടുക്കാനുള്ള സാവകാശമുണ്ട്. “ആ കാണുന്നതാണ് നിങ്ങളിപ്പോൾ കടന്നുവന്ന കോട്ടക്കടവ് പാലം,'' ശിവദാസൻ ചേട്ടൻ ഇടത്തോട്ട് ചൂണ്ടി. പാലത്തിലൂടെ വണ്ടികൾ തിരക്കിട്ടു പായുന്നത് തോണിയിലിരുന്നാൽ കാണാം. “ഈ പാലത്തിനടിയിൽ വെച്ച് പുഴ പല കൈവഴികളായി പിരിയും. വെള്ളത്തിന്റെ അളവ് കുറയും. പ്രളയം വന്നപ്പോഴും ഇവിടെ വെള്ളം കയറാതിരുന്നത് ഇതുകൊണ്ടാണ്. തുരുത്തുകളിൽ പലയിടത്തും പുഴയിലേക്ക് ചാഞ്ഞ തെങ്ങുകളിൽ ഹാമക്കുകളുടെ തൊട്ടിലാട്ടം.

പുഴയിൽ കുപ്പികളും തെർമോക്കോൾ കഷണങ്ങളും പൊങ്ങിക്കിടക്കുന്നു. അത് വേസ്റ്റല്ലെന്ന് ചേട്ടൻ തിരുത്തി. “ഇവിടെ കല്ലുമ്മക്കായ കൃഷിയുണ്ട്. ഇതിലൂടെ പോകുന്ന ബോട്ടുകാർ ശ്രദ്ധിക്കാൻ അടയാളമായി വെച്ചതാണ്.

കുട്ടികളുടെ സംഘം തോണിയിൽ എതിരേ വരുന്നു. കൂട്ടത്തിലൊരുത്തൻ കുനിഞ്ഞ് പുഴയിൽ കണ്ണാടി നോക്കി മുടിയൊതുക്കുന്നു. “ഞണ്ടിനെപ്പിടിക്കാനുള്ള പോക്കാണ്. അവർക്ക് ഈ കാറ്റും പുഴയുടെ ഒഴുക്കും നന്നായി അറിയാം. ആവശ്യമുള്ളത് ഞണ്ടിനെ കിട്ടിയാൽ സന്ധ്യക്കു മുൻപ് അവർ വീടെത്തും.

കണ്ടലിനുള്ളിൽ