ഖൽബ് നിറച്ച പാട്ടുകാരൻ

അനുഭവങ്ങൾ പകർന്ന പാഠങ്ങളാണ് കൊല്ലം ഷാഫിയുടെ പാട്ടിനും ജീവിതത്തിനും ഈണം നൽകുന്നത്

- വിഷ്‌ണു  രാമകൃഷ്ണൻ

വിരഹത്തിൻ വേദനയറിയാൻ സുന്ദരി നീ വന്നു ഗസലായ്...

പ്രണയത്തിന്റെയും വിരഹത്തിന്റെയും തീവ്രത ആസ്വാദകഹൃദയങ്ങളിലേക്ക് പകുത്തുനൽകിയ പാട്ടുകൾക്കുടമയാണ് കൊല്ലം ഷാഫി, ആൽബം ഗാനങ്ങളുടെ സുവർണകാലത്ത് വേറിട്ട ശബ്ദവുമായി രംഗപ്രവേശം ചെയ്ത ഷാഫി കേരളക്കരയാകെ ഓളം സൃഷ്ടിച്ചു. ഷാഫിയുടെ മാപ്പിളപ്പാട്ടുകൾ കേൾക്കാത്തവരും ഏറ്റുപാടാത്ത വരും വിരളം. ഇല്ലായ്മകളെ കഠിനാധ്വാനം കൊണ്ട് അതിജീവിച്ചും കലാരംഗത്തെ ഒറ്റപ്പെടുത്തലുകളോട് പൊരുതിയുമാണ് ഷാഫി പാട്ടിൽ നിലനിന്നത്. ഷാഫിയുടെ പാട്ടുകൾ നെഞ്ചേറ്റിയവരിൽ ഏറെയും സാധാരണക്കാർ തന്നെയായിരുന്നു. മുഹമ്മദീയ'ത്തിലെ പാട്ടുകാരായ ആതിഥേയൻ പങ്കുവച്ച ജീവിതത്തിനും പാട്ടിന്റെ ചേല്.

വിശപ്പ് മറക്കാനുള്ള വഴി

ചെറുപ്പത്തിൽ വിശപ്പ് മറക്കാൻ കേട്ടിരുന്ന പാട്ടുകളാണ് എന്നെ സംഗീതലോകത്തേക്കെത്തിച്ചത്. രാവും പകലുമില്ലാതെ ഉപ്പ കഷ്ടപ്പെടുന്നത് കണ്ടാണ് വളർന്നത്. സ്വന്തമായി സമ്പാദിക്കാനുള്ള ശ്രമങ്ങൾ സ്കൂളിൽ പഠിക്കുമ്പോഴേ തുടങ്ങി. അവധിക്കാലങ്ങളിൽ കൂട്ടുകാരുമൊത്ത് ചെറിയ കച്ചവടങ്ങൾ. പഠിക്കാൻ പിന്നാക്കമായിരുന്നു. പത്താംക്ലാസ് തോറ്റതോടെ പഠിപ്പ് നിർത്തി. പിന്നെ ഉപ്പ പണിയെടുത്തിരുന്ന ഹോട്ടലിൽ പോകാൻ തുടങ്ങി. അവിടെ കുറച്ചുകാലം. പിന്നെ നാടൻപണികളോരോന്നായി ചെയ്തു. ഓട്ടോ ഓടിച്ച് കുറേക്കാലം വരുമാനമുണ്ടാക്കി.

അന്നത്തെ അനുഭവങ്ങൾ തന്നെയാണ് ഇപ്പോഴും എന്റെ ജീവിതപാഠം. സാഹചര്യങ്ങൾ എന്തുതന്നെയായിരുന്നാലും നേരിടാനും പൊരുത്തപ്പെടാനുമുള്ള മനസ്സുണ്ടാകുകയാണ് പ്രധാനമെന്ന് അനുഭവത്തിൽ നിന്ന് ഞാൻ പഠിച്ചു. പെട്ടെന്ന് ഒരുദിവസം പാട്ടില്ലാതായാലും ജീവിക്കാനുള്ള വഴി കണ്ടെത്താമെന്ന ധൈര്യം ഇപ്പോഴെനിക്കുണ്ട്.

ഉമ്മയുടെ പാട്ടുകൾ

പലതരം ജോലികൾക്കിടയിലും ഞാൻ വിടാതെ കൂടെക്കൂട്ടിയത് പാട്ടിനെത്തന്നെയായിരുന്നു. പാട്ടിനോടുള്ള ഇഷ്ടം എന്നിൽ പെരുക്കാൻ കാരണക്കാരായവരിൽ ഒരാൾ ഉമ്മതന്നെയായിരുന്നു. ഉമ്മ വിജയവാഡയിലാണ് ജനിച്ചതെങ്കിലും വളർന്നത് കേരളത്തിലായിരുന്നു. ബന്ധുവീടുകളിലെ കുട്ടികൾ വരുമ്പോൾ ഉമ്മ അവർക്ക് പാട്ടുപാടിക്കൊടുക്കുമായിരുന്നു. കൂട്ടത്തിൽ ഞാനുമുണ്ടാകും. ഉമ്മ പാടുന്ന പാട്ടുകളുടെ ഈണം എപ്പോഴും എന്റെ മനസ്സിലുണ്ടാകും. ഉമ്മയുടെ സ്വാധീനം എന്റെ എല്ലാ പാട്ടുകളിലുമുണ്ട്.

ആത്മഹത്യയിൽനിന്ന് പാട്ടിലേക്ക്