ഓസ്കർ കാട്ടിലെ ആനക്കാര്യം

 തെപ്പക്കാട്ടിലെ ആനകളും അവരുടെ പരിപാലകരും ഓസ്കറിൽ കയ്യൊപ്പുചാർത്തുമ്പോൾ അവർക്കരികിലേക്ക് നടത്തിയ യാത്രകളുടെ ഓർമകളും ചിത്രങ്ങളും പങ്കുവെക്കുകയാണ് പ്രശസ്ത വന്യജീവി ഫോട്ടോഗ്രാഫറായ എൻ.എ. നസീർ

നിബിഢവനത്തിന്റെ പച്ചപ്പ് പടർന്ന വഴിത്താരകൾ കടന്നാൽ ബൊമ്മനും ബെല്ലിയും അവരുടെ അരുമകളായ കുട്ടിയാനകളും പാർക്കുന്ന തെപ്പക്കാടെത്താം. കാർത്തികി ഗോൺസാൽവസും ഗുനിത് മോംഗെയും ചേർന്നൊരുക്കിയ "ദി എലിഫെന്റ് വിസ്പറേഴ്സ് എന്ന ഹ്രസ്വചിത്രത്തിലൂടെയാണ് അവരുടെ കഥ ലോകമറിഞ്ഞത്. കാടും മനുഷ്യനും ചേരുന്ന മനോഹര ദൃശ്യങ്ങൾ പകർന്ന ഡോക്യുമെന്ററി ഓസ്കർ പുരസ്കാരവും സ്വന്തമാക്കി. ആ വലിയ നേട്ടം ഇന്ത്യയിലേക്കെത്തുമ്പോൾ ഞാൻ ഓർത്തെടുക്കുകയാണ് തെപ്പക്കാടുമായി ബന്ധപ്പെട്ട പഴയൊരോർമ 1993ലാണ്. തെപ്പക്കാട് ഫോറസ്റ്റ് ഓഫീസിൽ നിന്നും മോയാർ നദിയിലെ പാലം കടന്ന് ഞാൻ ആന ക്യാമ്പിനരികിൽ എത്തി. കുറച്ച് കഴിഞ്ഞ് ആനക്കാരൻ സുകുമാറും വന്നു.

കുറുമ്പ ആദിവാസി വിഭാഗത്തിൽ പെട്ട സുകുമാർ വയനാട് ബാവലിക്കാരനാണ്. ചെറുപ്പത്തിലേ തെപ്പക്കാട് വന്നതാണ്. ആനകളോടാണ് ചങ്ങാത്തം. മുതുമല ആന ക്യാമ്പിലെ ആനക്കാരനായിരുന്നു. ആനകളുമായി കേരളത്തി ന്റെ പല ഭാഗങ്ങളിലും സഞ്ചരിച്ചിട്ടുണ്ട്. പിന്നീടെപ്പോഴോ ആനക്കാര്യം വിട്ട് മസനഗുഡിയിലെ എന്റെ സുഹൃത്തായിരുന്ന മാർക്ക് ദാവീദാറിന്റെ കുശിനിക്കാരനായി. അവിടെവച്ച് കാട്ടാനകളുടെ മുന്നിൽ നിന്നും അത്ഭുതകരമായി രക്ഷപ്പെട്ട കഥകളൊക്കെ സുകുമാർ പറയും.

“പോകാം' ബീഡി ഒന്നു കൂടി ആഞ്ഞു വലിച്ച് നിലത്തേക്കിട്ട് പാദരക്ഷകൾ ഇല്ലാത്ത കാലുകൊണ്ട് അയാൾ ചവിട്ടി കെടുത്തി. “വേനലാണ്, തീ സൂക്ഷിക്ക ണം.'' സുകുമാർ പറഞ്ഞു.

“ആനയെ കാണുവാൻ?' ക്യാമറയിൽ ഫിലിം റോൾ കയറ്റുന്നതിനിടയിൽ ഞാൻ തിരക്കി. അക്കാലത്ത് ഇവിടെ ഡിജിറ്റൽ ഫോട്ടോ ഗ്രാഫി തുടങ്ങിയിട്ടില്ല.

“ആനകളെ മാത്രമേ കാണൂ, കരുതിയിരുന്നോളൂ.' സുകുമാർ ഉറക്കെ ചിരിച്ചു. പറഞ്ഞതു പോലെ തന്നെ മുന്നോട്ടുള്ള ഓരോ നടത്തത്തിലും ആനകൾ നിറഞ്ഞു. വേനൽക്കാലം ആയതുകൊണ്ട് പുഴയുടെ ഇരുകരകളിലും ആനകൾ ഉണ്ടായിരുന്നു.