കല്ലായിപ്പുഴ പോലെ ഇന്നും മാമു

ഞാനൊരു പടപ്പാണ്... എനിക്ക് പടച്ചവനുണ്ട്... തിരിച്ചറിവുകളുടെ പുഴക്കരയിൽ രോഗകാലം കടന്ന് പെരുന്നാളിനൊരുങ്ങുകയാണ് മാമുക്കോയ. ഒന്നിച്ചാഘോഷിക്കാൻ ഇന്നസെൻറ് ഒപ്പമില്ലെന്ന സങ്കടം ബാക്കി

- രജി ആർ നായർ

പൊതുവാൾജിയും യശ്വന്ത് സഹായിയും കൂടി കേരളത്തിന് സന്ദേശം നൽകിയ കാലം, തലയിൽ ചേരാത്തൊരു തൊപ്പി കമഴ്ത്തി, മാമുക്കോയ പൊതുവാൾജിയായി. വടക്കേ ഇന്ത്യൻ പാളത്താറണിഞ്ഞ്, ഇന്നസെന്റ് യശ്വന്ത് സഹായിയും. ആര് കൂടുതൽ ചിരിപ്പിക്കുമെന്നതിലായിരുന്നു മത്സരം. സന്ദേശം' സിനിമയിൽ അന്ന് പിറന്ന ചില ഡയലോഗുകൾക്ക് ഇന്നും ചെറുപ്പം. “നാരിയൽ കാ പാനി'' എന്താണെന്ന് മനസ്സിലാക്കിക്കാൻ പ്രയാസപ്പെട്ട സഹായ ജി. “വിദ്യാഭ്യാസമുള്ള ഒരുത്തനും നമ്മുടെ പാർട്ടിയിലില്ലേ?'' എന്ന് ചോദിക്കുന്ന പൊതുവാൾ ജി.

ആ ചിരിക്ക് വർഷങ്ങളുടെ ആയുസ്സ് പകർന്ന ഇന്നസെന്റ്, ജീവിതത്തിലെ അവസാന സീനും തീർത്ത് കടന്നു പോയി. ആ മനുഷ്യനെ സ്നേഹിച്ച പലരെയും പോലെ, മാമുക്കോയയ്ക്കും മറക്കാനാവുന്നില്ല ഒന്നും. നാലുനാൾ കഴിഞ്ഞപ്പോൾ, ഇന്നച്ചന്റെ കുടുംബത്തെ കാണാനും ആശ്വസിപ്പിക്കാനും ഇരിങ്ങാലക്കുട വരെ പോയി വന്നു മാമുക്കോയ. ആര്, ആരെ ആശ്വസിപ്പിക്കുമെന്നറിയാത്ത നിമിഷങ്ങൾ. ഓർക്കുമ്പോൾ, ഓരോ വാക്കിലും ഇന്നസെന്റ് ഒന്നിച്ചുണ്ടായിരുന്ന വലിയൊരു കാലം. കൂട്ട്, സ്നേഹം, സൗഹൃദം...

എന്നുമുതലുള്ള കൂട്ടാണ്?

“ദൂരെ ദൂരെ ഒരു കൂടുകൂട്ടാം' എന്ന സിനിമയുടെ സെറ്റിൽ വെച്ചാണ് ആദ്യം കണ്ടത്. അന്നുമുതൽ കൂട്ടുകാരാണ്. ഇപ്പോഴല്ലേ, ഷൂട്ടിങ് സമയത്ത് ഓരോരുത്തർക്കും ഓരോ മുറിയും സൗകര്യവുമൊക്കെ. അന്ന് ഒരു മുറിയിൽ രണ്ടുപേരൊക്കെയുണ്ടാവും. അങ്ങനെ ഒന്നിച്ചു താമസിച്ചിട്ടുണ്ട്. ഞാനും ഇന്നസെന്റും ഒരുപാട് കാലം. ഷൂട്ടിങ് കഴിഞ്ഞ് റൂമിലെത്തിയാൽ പിന്നെ, കഥപറച്ചിലാണ്. ചിലർ സിനിമയിൽ തമാശക്കാരാണെങ്കിലും ജീവിതത്തിൽ ഗൗരവക്കാരായിരിക്കും. ഇന്നസെന്റ് അങ്ങനെയല്ല. സിനിമയിലെപ്പോലെ, ജീവിതത്തിലും ധാരാളം തമാശ പറയും.