ജൂലിയുടെ സ്വന്തം റാണി

റാണിക്കിത് രണ്ടാം ജന്മം. കടിച്ച പാമ്പിനെ കുടഞ്ഞെറിഞ്ഞ് ജൂലി നൽകിയ സമ്മാനം...

- എം. അഭിലാഷ്

കണ്ണ് നട്ട് കാത്തിരിക്കുകയായിരുന്നു ജൂലി, ആറുദിവസങ്ങൾ  സൂര്യൻ ഉദിച്ചസ്തമിച്ചു. ഏഴാം ദിവസത്തെ പകലിൽ ഗേറ്റിന് വെളിയിൽ കാർ വന്ന് നിന്നപ്പോൾ എന്തെന്നില്ലാത്ത സന്തോഷത്തിൽ ജൂലി ഗേറ്റിനരികിലേക്ക് ഓടി. കാറിന്റെ ഡോർ തുറന്നതും ജൂലി, റാണിയുടെ മടിത്തട്ടിലേക്ക് ചാടിക്കയറിയതും ഒന്നിച്ചായിരുന്നു. പിന്നെ ഇരുവരുടെയും സ്നേഹപ്രകടനങ്ങൾ. തന്റെ ജീവൻ രക്ഷിച്ച് വളർത്തുനായയായ ജൂലിയെ ചുംബിക്കുമ്പോൾ റാണിയുടെ കണ്ണുകൾ നിറഞ്ഞൊഴുകി. മൂർഖന്റെ രൂപത്തിൽ മരണം വന്ന് റാണിയെ മാടി വിളിച്ചപ്പോൾ ജൂലി നടത്തിയ ഇടപെടലാണ് ജീവന്റെ പാലത്തിലേക്ക് ഈ അധ്യാപികയെ തിരിച്ചു നടത്തിയത്. ആലപ്പുഴ, ആയാപറമ്പ് ഗവ. ഹയർ സെക്കൻഡറി സ്കൂൾ അധ്യാപികയായ പുറക്കാട് പുന്തല കെങ്കത (വെളിമ്പറമ്പിൽ) വിശ്വകുമാരി (റാണി) യും അവരുടെ വളർത്തുനായയുമാണ് ഈ കഥയിലെ പ്രധാനകഥാപാത്രങ്ങൾ. റാണിയുടെ ജീവന്റെ ഇപ്പോഴത്തെ ഉടമ ജൂലിയാണെന്ന് റാണിയുടെ ഭർത്താവ് മധുവും സാക്ഷ്യപ്പെടുത്തുന്നു. പാമ്പ് കടിയേറ്റ റാണിയുടെ ജീവൻ രക്ഷിച്ച ജൂലി ഇന്ന് നാട്ടിലെ സൂപ്പർസ്റ്റാർ കൂടിയാണ്. പുതുജീവിതത്തിന്റെ വെളിച്ചം നിറയുന്ന പകലിരുന്ന് ജൂലിയെ മടിത്തട്ടിലിരുത്തി റാണി ആ അതിജീവനകഥ പറഞ്ഞുതുടങ്ങി.