எத்தனை மனிதர்கள்? 41 சிறைப் பறவைகள்!

உலகில் ஒவ்வொருவருக்கும் ஒவ்வொரு விதமான அனுபவங்கள் கிடைத்திருக்கும். விமானத்தில் வாரம் ஒரு முறையாவது பறந்து கொண்டிருப்பார் ஒரு மனிதர், நான் ஒரே முறை விமானத்தில் பறந்திருக்கிறேன் என்பார் இன்னொருவர், விமானமா? அப்படி என்றால் என்ன என்று கேட்பவர்களும் இருக்கத்தான் செய்கிறார்கள்.

- டாக்டர் அகிலாண்ட பாரதி

ஆண்டுக்கு ஒரு முறை மலைப்பிரதேசம் சென்று வருவேன் என்பவர்களும் இருக்கிறார்கள், என் ஊரைத் தாண்டி வெளியே போனதே இல்லை என்பவரும் இருக்கிறார்கள். பிறந்தது முதல் இறப்பதுவரை மலைப்பிரதேசத்திலேயே வாழ்பவரும் இருக்கிறார்கள். ஒரே விதமான அனுபவங்களை எல்லோராலும் பெற்றுவிட முடியாது.

விஜயா நான் நன்கறிந்த பெண்மணி. அவருக்கு சுமார் ஐம்பது வயதிருக்கலாம். சிறுவயதிலேயே கணவர் விட்டு விட்டு எங்கோ சென்று விட, ஒற்றை மகனை அரும்பாடு பட்டு வளர்த்தார். கஷ்ட நஷ்டங்களைச் சொல்லியே வளர்த்திருந்தாலும் மகன் வளர வளர அதிக ஆசைகளுடன், செலவாளியாக வளர்ந்தான்.