பேஷன்...பயங்கரம்?

நாகரீகம் என்பது ஒருவரின் நடை, உடை, பாவனைகளை குறிப்பது. சிலவேளைகளில் நாகரீகம் கோமாளித்தனமாக மாறிவிடுகிறது.

அதைக் கருத்தில் கொண்டுதான் 'நாகரீகக் கோமாளி' என்ற கேரக்டரே கூத்துகள், நாடகங்களில் அறிமுகப்படுத்தப்பட்டது. அப்படிப்பட்ட நாகரீக கோமாளித்தனம் இப்போது அதிகரித்துவிட்டது.

ஆண்கள் பாவாடை உடுத்திக்கொண்டு நடப்பது, பெண்கள் லுங்கி அணிந்து கொண்டு தொடை தட்டுவது என்றெல்லாம் சமூக வலைதளங்களில் கோமாளித்தனம் செய்கிறார்கள்.

திருச்சி சத்திரம் பேருந்து நிலையம் அருகே ஏலியன் ஈமோ டாட்டூ ஸ்டுடியோ நடத்தி வந்த ஹரிஹரன்,

ஆண்கள், பெண்களுக்கு உடலில் டாட்டூ குத்தி வந்துள்ளார்.

அத்தோடு நிறுத்தியிருந்தால் பரவாயில்லை, தனது கண்களில் நிறம் பூசிக் கொண்டு, நாக்கை இரண்டாக அறுத்து வித்தை காண்பித்த ஹரிஹரன், அதனை தனது சமூக வலைதளங்களில் வெளியிட்டு பலரை கவர்ந்துள்ளார்.

மகாராஷ்டிரா மாநிலம் மும்பைக்குச் சென்று கண்களில் ஊசி செலுத்தி விழியை நிறம் மாற்றுதல், நாக்கின் நுனியை வெட்டி, இரண்டாக பிளந்து காட்டுதல், அதில் டாட்டூ வரைதல் என உயிருக்கு ஆபத்தான முறைகளை கற்று வந்துள்ளார்.

தனது கடையில் வேலை பார்த்து வந்த நண்பரான ஜெயராமன் (24) என்ற இளைஞருக்கும், கண்களில் ஊசி செலுத்தி விழி நிறத்தை மாற்றியுள்ளார்.