பறிபோகும் இளம் தளிர்கள்.. காரணம் என்ன?

இளமையில் வறுமை கொடியது என்பார்கள். அதைவிட கொடுமையானது சிறுவயது மரணம். உணவும் உறவும் இல்லாமல் ஆயிரக்கணக்கான இள உயிர்கள் வீதியில் பிரிகின்றன. ஆனால், போதுமான வாழ்க்கை, தேவையான வசதி, ஆதரவான உறவு, அரவணைக்கும் சுற்றம் என யாவும் இருந்தும் ஆவியை போக்கிக்கொள்ளும் குழந்தைகள் நிலைதான் புதிதாகவும் புதிராகவும் இருக்கிறது.

- நெல்லை பரிதி

இசையமைப்பாளர், நடிகர், இயக்குனர், படத்தொகுப்பாளர், என தமிழ் சினிமாவில் பன்முக திறமையாளராக விளங்கும் விஜய் ஆண்டனிக்கு அன்புக்கு ஆயிரக்கணக்கில் ரசிகர் பட்டாளம். ஆசைக்கு இரு பெண் குழந்தைகள். அதில் ஒருவர் மீரா. 2007ல் பிறந்த மீரா தனது இனிய 16 வயதில் பிளஸ் டூ படித்துவந்தார். சில நாட்களுக்கு முன்பு தூக்கிட்டு தற்கொலை செய்து கொண்டார்.

எவ்வித உறவு சிக்கலும், உடல்நலப் பிரச்சனையும் இல்லாத சின்னஞ்சிறு பெண் எடுத்த இந்த விபரீத முடிவு விஜய் ஆண்டனியை உலுக்கிவிட்டது.

மீரா கடந்த ஓர் ஆண்டாகவே மன அழுத்தத்தால் பாதிக்கப்பட்டிருந்ததாகவும், அதற்காக காவேரி மற்றும் அப்பல்லோ மருத்துவமனைகளில் சிகிச்சை மேற்கொண்டதாகவும் தொடக்கத்தில் சொல்லப்பட்டது. ஆனால், அது தவறான தகவல் என தாயார் பாத்திமா மறுத்துள்ளார்.

கடந்த மார்ச் மாதம், பாத்திமா தனது மகள் மீரா, சென்னையில் உள்ள சேக்ரட் ஹார்ட் பள்ளியில் கலாச்சார செயலாளராக ஆன புகைப்படத்தைப் பகிர்ந்து, "என் வலிமையின் பின்னால் உள்ள சக்தி, என் கண்ணீருக்கு ஆறுதல்கள், என் மன அழுத்தத்திற்கு காரணம் (குறும்பு சூப்பர் லோடட்) என் தங்ககட்டி, -செல்லக்குட்டி. மீரா விஜய் ஆண்டனி, காங்கிராட்ஸ் பேபி" என அவர் இட்டிருந்த சமூக வலைத்தளப் பதிவு அவர்களின் மகிழ்ச்சியான சூழலுக்கு ஆதாரமாக உள்ளது.