விஷமாகும் பிரீசர் சிக்கன்.. உஷார்!

'ஷவர்மா சாப்பிட்டதால் சிறுமி உயிரிழப்பு!' 'பர்க்கர் சாப்பிட்டதால் மருத்துவமனையில் அனுமதி', 'சிக்கன் ரைஸ் சாப்பிட்டதால் 26 பேர் மருத்துவமனையில் அனுமதி' போன்ற செய்திகளைத் தற்சமயம் அதிகம் பார்க்க முடிகிறது. சில மாதங்களுக்கு முன்பாக கேரளத்தில் அதிகம் காணப்பட்ட இத்தகைய செய்திகள் இப்பொழுது தமிழ்நாட்டின் பல நகரங்களில் பார்க்க முடிகிறது.

என் தினசரி மருத்துவப் பணியிலும் ஷவர்மா சாப்பிட்டேன், வாந்தியும் வயிற்றுப் போக்கும் நிற்காமல் போகிறது என்று கூறும் பலரைப் பார்க்கிறோம்.

ஷவர்மா என்றில்லை, தந்தூரி சிக்கன், கிரில், நூடுல்ஸ், ஃப்ரைட் ரைஸ், பானிபூரி என்று பல துரித உணவுகள் சாப்பிட்ட பின்னரும் இதே அறிகுறிதான்.

நாமக்கல் மாவட்ட நிர்வாகம் தற்காலிகமாக ஷவர்மாவைத் தடை செய்து விட்டது என்ற செய்தி நமக்குக் கிடைக்கிறது.

அரபு நாடுகளில் ஷவர்மா மாவுச்சத்து, புரதம் கொழுப்புச் சத்துக்கள் ஆகியவை நிரம்பிய சமச்சீர் உணவாகப் பார்க்க முடிகிறது. மேற்கத்திய நாட்டவர் முட்டை, காய்கறி, பிரட் கலந்த சாண்ட்விச்சை சாப்பிட்டு விட்டு காலை உணவை முடித்துக் கொள்வது போல் அரபு நாடுகளில் பலரும் ஷவர்மாவை நாடுகின்றனர்.