உன்னை உனக்கே பிடிக்கணும்

நினைவுச் சங்கிலியின் ஒரு பகுதியாக ஏதாவது ஒரு நபரைப் பற்றி, அவருடன் பேசியது பற்றி நினைத்துக் கொண்டிருப்போம், எதிர்பாராத விதமாக அவரே எதிரில் வருவார். எனக்குப் பல சமயங்களில் அப்படி நடந்திருக்கிறது.

எண்ண அலைகளுக்கு சக்தி இருக்கிறதா, டெலிபதி என்கிறார்களே அப்படியா, இல்லை பலரையும் நினைப்பதால் எதேச்சையாக அதில் ஒருவர் எதிர்ப்பட்டு விடுகிறாரா? என்று பலமுறை யோசித்திருக்கிறேன்.

நடைப் பயிற்சியில் பலதரப்பட்ட மக்களையும், உயிரினங்களையும் பார்க்கும் போது இந்த பிரபஞ்சம் மிகச் சிறியது, அதில் நாம், நமது பிரச்சனை எல்லாம் ஒன்றுமே இல்லை என்ற நினைவு வலுப்பெறுவது போல் தோன்றும்.

அப்போதைய கடினமான பயணத்தில் தொந்தரவு கொடுத்த சிலரைப் பற்றி எண்ணிக் கொண்டே நடந்து ரயில் நிலைய வாசலைக் கடந்த போது, அதில் முக்கியமான ஒரு நபர் சாலையின் மறுபுறத்தில் என்னை நோக்கிய திசையில் நடந்து வந்தார். அனிச்சைச் செயலாக நான் புன்னகைக்க, அவரும் புன்னகைத்தார்.