ஆன்லைனில் தீபாவளி...

ஐப்பசியில் தீபாவளி என்றால் புரட்டாசி மாதம் முழுக்க தீபாவளிக்கான முன்னேற்பாடுகள் களை கட்டியது... அது ஒரு கனாக்காலம்.

இரண்டு மாதத்துக்கு முன்பே டிரஸ் எடுத்து தையல்காரரிடம் கொடுத்து தைத்து வாங்கி தீபாவளி தின அதிகாலை நேரத்துக்கு காத்திருப்பது அப்போது தனிசுகம்.

தீபாவளி பலகாரங்கள் எல்லாம் 15 நாட்கள் முன்னர் தயார் செய்யப்படும். இதற்காகவே வயதான பாட்டிகள், அம்மா, தங்கை, பக்கத்து வீட்டு பெண்கள் புடை சூழ விவாதமே நடக்கும். அரிசி களைவது, காயப்போடுவது, மாவு இடிப்பது என ஒரே பரபரப்பை ஏற்படுத்துவார்கள்.

வீடுகளில் பதமாக அரிசியை காய வைத்து அதை அரைத்து, கையால் பிசைந்து மண் மணக்கும் வெல்லம், வறுத்த எள், முந்திரி, வேர்க்கடலை உள்ளிட்ட சிறு தானியங்கள் என நறுமணம் கமழ கலந்து தயாரிக்கும்போது பாரம்பரிய சுவை, மணம் சேர்ந்து பலகாரங்கள் அற்புதமாக இருக்கும்.