എമിലി ഡിക്കിൻസൺ

ഇതിഹാസത്തിലെ സ്ത്രീകൾ

- കണക്കൂർ ആർ. സുരേഷ്കുമാർ

അമേരിക്കയുടെ കവിതാലോകം വേറിട്ട ശബ്ദങ്ങളാൽ വിപുലമാണ്. ജനങ്ങളിൽ സ്വാധീനശക്തിയായി മാറിയ നിരവധി എഴുത്തുകാർ ആ ദേശത്തിലുണ്ട്. അമേരിക്കയിലെ പ്രമുഖരായ കവയത്രിമാരിൽ ഒരാളായ എമിലി ഡിക്കിൻസൺ ഏറെക്കാലം ഏകാന്തജീവിതമായിരുന്നു നയിച്ചിരുന്നത്. അടച്ച മുറിയിൽ ജീവിച്ച അവൾ മറ്റാരുമായും ഒരുതരത്തിലും ബന്ധം പുലർത്തിയില്ല. സൗഹൃദമുണ്ടായിരുന്ന ആരെയും വീട്ടിനുള്ളിലേക്ക് പ്രവേശിപ്പിച്ചില്ല. കത്തുകളിൽ കൂടെ മാത്രമായിരുന്നു അവരുമായി ബന്ധം പുലർത്തിയിരുന്നത്. അവൾ അവിവാഹിതയാണ് ജീവിച്ചത്.

കവിതയിൽ തിളങ്ങിനിന്ന അവളുടെ ജീവിതകാലത്ത് എമിലിയുടേതായി വളരെ കുറച്ചു കവിതകൾ മാത്രമാണ് പ്രസിദ്ധീകരിച്ചു വന്നത്. അന്നത്തെ കാവ്യ നിയമങ്ങളൊന്നും പിന്തുടരാതെയുള്ള രചനാശൈലിയിലാണ് അവൾ എഴുതിയിരുന്നത്. ചെറിയ ചെറിയ വരികൾ അടങ്ങിയ രചനകൾക്ക് പലതിനും ശീർഷകങ്ങൾ ഉണ്ടായിരുന്നില്ല. കുത്തും കോമയും ഉപയോഗിക്കാതെയും വലിയക്ഷരങ്ങൾ വേണ്ടിടത്ത് അവ ഉപയോഗിക്കാതെയുമാണത്രേ കവിതകൾ പിറന്നത്.