പുതുകാല നേതൃമുഖം

നിയമസഭാംഗമായും കെ.പി.സി.സി. ഉപാദ്ധ്യക്ഷൻ എന്ന നിലയിലും കാഴ്ചവച്ച സ്തുത്യർഹമായ സേവനങ്ങളിലൂടെ ശ്രദ്ധാകേന്ദ്രമായ അദ്ദേഹം പ്രതിപക്ഷ നേതാവ് എന്ന നിലയിലും വേറിട്ട മുഖമാണ്. ആവശ്യത്തിനും അനാവശ്യത്തിനും ഭരണകൂടത്തെ തേജോവധം ചെയ്യാൻ ഇറങ്ങി തിരിച്ച് പ്രതിപക്ഷ നേതാവല്ല അദ്ദേഹം. ഭരണകക്ഷിയെ നിരന്തരം പ്രതിക്കൂട്ടിൽ നിർത്തുക എന്നതിനപ്പുറം ക്രിയാത്മകമായ സഹകരണം നൽകുകയും അതേസമയം എതിർക്കുകയും വിമർശിക്കുകയും ചെയ്യേ ഘട്ടങ്ങളിൽ സന്ധിയില്ലാതെ അത് ചെയ്യാനും മടിക്കാത്ത വിവേചന ശേഷിയുളള നേതാവ്.

- sajil sreedhar

കേരള രാഷ്ട്രീയത്തിലെ സൗമ്യമുഖങ്ങളിലൊന്നാണ് വി.ഡി. സതീശൻ. അതേസമയം പ്രതികരിക്കേണ്ട സന്ദർഭങ്ങളിൽ അതിരൂക്ഷമായി പ്രതികരിക്കാനും തന്റെ വാദമുഖങ്ങൾ കാര്യകാരണസഹിതം സമർത്ഥിക്കാനും മികച്ച ഭാഷയിൽ അവതരിപ്പിക്കാനും കഴിവുളള സതീശൻ കേവലം നിയമസഭാസാമാജികനായി മാത്രം ഒതുങ്ങിക്കഴിഞ്ഞിരുന്ന കാലത്തും തന്റെ കഴിവ് പ്രകടമാക്കിയിരുന്നു.

പ്രായം കൊണ്ട് അൻപതുകളുടെ അവസാന പാദത്തിലെത്തിയെങ്കിലും ഇന്നും കാൺഗ്രസിലെ ന്യൂജനറേഷൻ മണിയുടെ അധിനായകനായി കരുതപ്പെടുന്നയാളാണ് സതീശൻ. അത് സമീപനത്തിന്റെ സവിശേഷത കൊണ്ട് മാത്രം ലഭിക്കുന്ന ബഹുമതിയാണ്. പരമ്പരാഗത ധാരണകളെ പൊളിച്ചെഴുതിക്കൊണ്ട് സംഘടനയ്ക്ക് പുതിയ മുഖം നൽകുക എന്ന കാഴ്ചപ്പാട് അദ്ദേഹത്തിന്റെ ഉളളിൽ പണ്ടേയുളളതാണ്. അതിന് പ്രതിപക്ഷ നേതൃപദവിയുമായി പോലും ബന്ധമില്ല. എന്നാൽ പഴയവരെയും പരമ്പരാഗത മൂല്യങ്ങളെയും ഹനിച്ചും തമസ്കരിച്ചും മുന്നോട്ട് നീങ്ങുന്നയാളല്ല സതീശൻ. മുൻഗാമികളുടെയും പിൻഗാമികളുടെയും നല്ല വഴികളും നിർദ്ദേശങ്ങളും സ്വാംശീകരിച്ച് തനത് വീക്ഷണങ്ങളുമായി സംയോജിപ്പിച്ച് പ്രസ്ഥാനത്തെ നയിക്കാൻ അദ്ദേഹത്തിന് അറിയാം.

പാർലമെന്ററി പാർട്ടി ലീഡർ എന്നതിനപ്പുറം കേരളത്തിലെ സംഘടനയ്ക്ക് ഒന്നടങ്കം സതീശന്റെ നേതൃത്വം പുതിയ ഉണർവും ഉൾക്കാഴ്ചയും നൽകി എന്ന വസ്തുത അവിതർക്കിതമാണ്. നിഷ്പക്ഷമതികൾ മാത്രമല്ല സതീശനോട് വ്യക്തിപരമായി ആഭിമുഖ്യം കുറഞ്ഞവർ പോലും രഹസ്യമായി സമ്മതിക്കുന്നവയുമാണ്.