അഭിനയം എനിക്ക് ജീവവായു

നാടകം, സിനിമ, സീരിയൽ... വിവിധ മാധ്യമങ്ങളിലൂടെ അഭിനയ രംഗത്ത് പവൻ മാറ്റുളള പ്രകടനം കാഴ്ച വച്ച ടൈറ്റസ് ഏബ്രഹാം തന്റെ ജീവിതത്തിലെ വഴിത്തിരിവുകൾ ഓർത്തെടുക്കുന്നു.

- ഉമ ആനന്ദ്

 നാടകങ്ങളിൽ അഭിനയിച്ചു തുടങ്ങുമ്പോൾത്തന്നെ നായക വേഷം. പിന്നീട് സീരിയൽ രംഗത്തിലെത്തിയപ്പോൾ അവിടെയും ശ്രദ്ധേയമായ കഥാപാത്രങ്ങൾ. ഒടുവിൽ സിനിമയിലെത്തിയപ്പോൾ ആദ്യ അവസരം തന്നെ അതുല്യ പ്രതിഭ മണിരത്നം സാറിന്റെ സിനിമയിൽ

രണ്ടു സീരിയലുകളുടെ നിർമ്മാതാവ്.

അധികമാർക്കും ലഭിക്കാത്ത ഈ ഭാഗ്യം ലഭിച്ച കലാകാരനായ ടൈറ്റസ് എബ്രഹാം താൻ പിന്നിട്ട വഴികൾ ഓർത്തെടുക്കുന്നു.

“ജനിച്ചത് പറവൂരിൽ പഠനം പറവൂരിലും കളമശ്ശേരിയിലും. അമച്വർ നാടകങ്ങളിൽ അഭിനയിച്ചു തുടങ്ങിയ കാലത്തു തന്നെ നായക കഥാപാത്രം ചെയ്യാനുള്ള ഭാഗ്യമുണ്ടായി. എന്നിട്ടും നിങ്ങളെന്നെ സ്നേഹിക്കുന്നു' അതായിരുന്നു ആദ്യ നാടകം.

എറണാകുളത്ത് ജോലിയും പിന്നെ നാടകവും ഒരുമിച്ചായിരുന്നു കൊണ്ടുപോയ്ക്കൊണ്ടിരുന്നത്. രണ്ടിലേതെങ്കിലും ഒന്നേ നടക്കു എന്ന അവസ്ഥ വന്നപ്പോൾ നാടകത്തിനും തലയ്ക്ക് പിടിച്ചു തുടങ്ങിയ സിനിമയ്ക്കും തന്നെയായിരുന്നു മുൻതൂക്കം നൽകിയത്.

സിനിമയിലെ ആദ്യ അവസരം മണിരത്നത്തിന്റെ "ഉണരൂ' എന്ന സിനിമയിൽ.

പിന്നീട് നായ്ക്കളി എന്ന പ്രശസ്ത നാടകത്തിലൂടെ ജോൺ എബ്രഹാമിന്റെ സന്തത സഹചാരിയായി. അദ്ദേഹത്തിന്റെ പുതിയ സിനിമ പ്ലാൻ ചെയ്തപ്പോൾ സ്ക്രിപ്റ്റ് സഹായിയായി കൂടി. അദ്ദേഹത്തിന്റെ അപ്രതീക്ഷിതമായ വിയോഗം എന്നിൽ വല്ലാത്ത നടുക്കമാണുണ്ടാക്കിയത്.