കലയും കാലവും കാലഘട്ടവും

ഇവർ അഞ്ച് സ്ത്രീകൾ, മുതിർന്ന കുട്ടികളുടെ അമ്മമാരും ചിലർ മുത്തശ്ശിമാരുമാണ്. ഇവർ അങ്ങേയറ്റം ചെയ്യുന്ന കല കഥകളിയാണ്. പഠിച്ചെടുക്കാനും അവതരിപ്പിക്കാനും ഏറെ ബുദ്ധിമുട്ടുള്ള കലയാണ് കഥകളി.

- നാരായണൻ പോറ്റി

കലയോടുള്ള അഭിരുചി ഒട്ടുമുക്കാൽ മനുഷ്യരുടെയും മനോവ്യാപാരമാണ്. ചിലർ തങ്ങളുടെ അഭിരുചിപ്രകാരം കലാജീവിതം നയിക്കും. ജീവിതത്തിലെ സ്വാതന്ത്ര്യമുള്ള ബാല്യകൗമാരങ്ങളിൽ അൽപ്പം കലയുമായി ചിലർ, പ്രാരാബ്ധത്തിലേയ്ക്ക്  നടക്കുന്ന കടക്കുമ്പോൾ അഭിരുചികളെ ഉള്ളിലൊതുക്കി ജീവിതത്തിന്റെ തീക്ഷ്ണതയിലൂടെ നീങ്ങും. അങ്ങനെ തന്നിലെ ഇഷ്ടങ്ങളെ, ഉള്ളിലൊതുക്കി ജീവിക്കാൻ പ്രേരിപ്പിക്കപ്പെട്ടവരാണ് സ്ത്രീകളിൽ ഏറിയപങ്കും. ഭാര്യ, അമ്മ, മകൾ, കുടുംബം എന്നിങ്ങനെ ഒട്ടനവധി ഉത്തരവാദിത്വത്തിലൂടെയാണ് ഒരു സ്ത്രീയുടെ ജീവിതചക്രം കടന്നുപോകുന്നത്. സ്വന്തം ഇഷ്ടങ്ങളെ, ഒതുക്കി മറ്റുള്ളവർക്കുവേണ്ടി, വരും തലമുറയ്ക്കുവേണ്ടി ജീവിക്കുക എന്നതാണ് ചുരുക്കത്തിൽ സ്ത്രീജന്മത്തിന്റെ ത്യാഗം. ഇന്നിപ്പോൾ കാലവും കാലഘട്ടവും ഏറെ മാറിക്കഴിഞ്ഞു. ജീവിതത്തിരക്കിനിടയിൽ സ്വന്തം അഭിരുചികളെ പ്രോത്സാഹിപ്പിക്കാനുള്ള സ്വാതന്ത്ര്യവും ഇന്നിപ്പോൾ കാലഘട്ടം സ്ത്രീകൾക്ക് നൽകിക്കഴിഞ്ഞു. ഇഷ്ടങ്ങളെ പരിപൂർണ്ണമായി അടച്ചുപൂട്ടേണ്ട അവസ്ഥ ഇന്നിപ്പോഴില്ല.