കാര്യസ്ഥനിൽ നിന്നും 11 വർഷങ്ങൾ

ഒരു നാടൻ കുട്ടിയായി സ്ക്രീനുകളിൽ മിന്നിത്തിളങ്ങിയ മഹിമ നമ്പ്യാർ തന്റെ പതിനൊന്നു വർഷങ്ങളുടെ സിനിമാജീവിതാനുഭവങ്ങൾ 'മഹിളാരത്ന'വുമായി പങ്കുവയ്ക്കുന്നു.

- എ.കെ

ആദ്യസിനിമയിൽ നിന്നും ഇപ്പോൾ നായികയായി പ്രേക്ഷകരുടെ മനസ്സ് കീഴടക്കിയിരുന്നു. ഇത്രയും വർഷങ്ങൾ എങ്ങനെ ഓർക്കുന്നു...?

എന്റെ ആദ്യസിനിമ ദിലീപേട്ടന്റെ അനിയത്തിയായി കാര്യസ്ഥനിലാണ്. അതിപ്പോൾ ഇറങ്ങിയിട്ട് ഏകദേശം 11 വർഷം കഴിഞ്ഞു. മലയാളത്തിൽ മഹിമ എന്ന പേരുറപ്പിക്കാൻ എനിക്ക് 11 വർഷമെടുത്തു. അതിനുവേണ്ടി ഞാൻ ശരിക്കും അധ്വാനിച്ചിട്ടുണ്ട്.

കാര്യസ്ഥനിൽ നിന്നും ആർ.ഡി.എക്സിൽ  എത്തുമ്പോൾ വലിയൊരു ട്രാൻസ്ഫോർമേഷനാണ് മഹിമയ്ക്ക് സംഭവിച്ചിട്ടുള്ളത്. അതിനെ എങ്ങനെയാണ് സ്വയം വിലയിരുത്തുന്നത്?

കാര്യസ്ഥനിൽ അഭിനയിക്കുമ്പോൾ ഞാൻ പത്താം ക്ലാസ് കഴിഞ്ഞിട്ടേയുള്ളൂ. അതിനുശേഷം എനിക്കൊരു തമിഴ് ചിത്രം കിട്ടിയതിൽ ഒരു നാടൻ പെൺകുട്ടി വേഷമായിരുന്നു. ഇതിനുശേഷം എനിക്ക് കിട്ടിയ വേഷങ്ങൾ എല്ലാം തന്നെ ഒരുപോലെയായിരുന്നു. ഒരു രണ്ടുവർഷം മുൻപ് വരെ ഞാൻ ചെയ്ത ചിത്രങ്ങൾ എല്ലാം തന്നെ നാടൻ പെൺകുട്ടി വേഷമായിരുന്നു. അപ്പോൾ ആ സമയതൊക്കെ സോഷ്യൽ മീഡിയയിലും മറ്റും വരുന്ന എന്റെ ചിത്രങ്ങളെല്ലാം തന്നെ ആ സിനിമയുമായി ബന്ധപ്പെട്ടതായിരിക്കും. വർഷങ്ങൾ കഴിയുമ്പോഴാണ് നമ്മൾ സെൽഫ് കെയറിനെ പറ്റിയും മറ്റുമൊക്കെ പഠിക്കുന്നത്. അങ്ങനെ വന്ന മാറ്റങ്ങളാണ് ഇവയെല്ലാം. എന്റെ ശരീരത്തെപ്പറ്റി എനിക്ക് നല്ല ബോധ്യമുണ്ട്. ഇപ്പോൾ നല്ലവിധം ഡയറ്റും മേക്കപ്പും സ്കിൻ കെയറും എല്ലാം നല്ല വിധം ശ്രദ്ധിക്കാറുണ്ട് . അതാണ് നിങ്ങൾ കാണുന്ന ട്രാൻസ്ഫോർമേഷൻ.

ആർ.ഡി.എക്സ് സിനിമ റിലീസായ സമയത്ത് കേട്ട മറ്റൊരു വിമർശനമാണ് നായികയെ അനാവശ്യമായി നിറം കുറച്ചിരുന്നു എന്നുള്ളത്.

 ലുക് ടെസ്റ്റിന്റെ സമയത്തുതന്നെ തീരുമാനിച്ചതായിരുന്നു. രണ്ട് കാലഘട്ടങ്ങൾ കാണിക്കുന്നുണ്ടല്ലോ. അതിൽ വർത്തമാനകാലം കാണിക്കുമ്പോൾ ആയിരുന്നു നിറം കുറവ് വേണ്ടിയിരുന്നത്. പക്ഷേ അതെന്തു കൊണ്ടെന്നാൽ സിനിമയ്ക്ക് വേണ്ട നിറവും എന്റെ നിറവും തമ്മിൽ നല്ല വ്യത്യാസം ഉണ്ടായിരുന്നു എന്നുള്ളതാണ്. അതുകൊണ്ടാണ് അങ്ങനെ ടോൺ ഡൗൺ ചെയ്തത്.