ടീവിയുടെ കാലാവധി നീട്ടാം

വളരെയധികം വില കൊടുത്ത് ടി.വി വാങ്ങിയതുകൊണ്ട് മാത്രമായില്ല അത് ദീർഘകാലം കേട് കൂടാതെ നിലനിൽക്കാനുള്ള വഴികളും നാം അറിഞ്ഞിരിക്കണം. ഇതാ അതിനുതകുന്ന ചില പ്രധാനപ്പെട്ട മാർഗ്ഗനിർദ്ദേശങ്ങൾ.

- ഗീതാഹരിഹരൻ

ഇന്ന് ടി.വി ഇല്ലാത്ത വീടുകളുണ്ടോ? ഇല്ലെന്നുതന്നെ പറയാം. വളരെയധികം വില കൊടുത്ത് ടി.വി വാങ്ങിയതുകൊണ്ട് മാത്രമായില്ല അത് ദീർഘകാലം കേട് കൂടാതെ നിലനിൽക്കാനുള്ള വഴികളും നാം അറിഞ്ഞിരിക്കണം. ഇതാ അതിനുതകുന്ന ചില പ്രധാനപ്പെട്ട മാർഗ്ഗനിർദ്ദേശങ്ങൾ.

1. ഒരു ടി.വി സെറ്റിന്റെ ആയുസ്സ് എന്നത് അത് വാങ്ങി എത്ര വർഷമായി എന്നതല്ല മറിച്ച് ദിവസവും നാം എത്ര മണിക്കൂറോളം ടി.വി ഉപയോഗിക്കുന്നുവെന്നതിനെ ആശ്രയിച്ചാണ് ഇരിക്കുന്നത്. ചില വീടുകളിൽ വീട്ടമ്മമാർ അടുക്കള ജോലിയിൽ ഏർപ്പെടുമ്പോഴും ഡ്രോയിംഗ് റൂമിലെ ടി.വി ഓൺ ചെയ്തു തന്നെ കിടക്കും. ചിലയാളുകൾ രാത്രി ഉറങ്ങുന്ന നേരത്ത് ടി.വി ഓഫ് ചെയ്യാൻ മറന്നുപോകും. ഇത്തരത്തിലുള്ള ചെയ്തികളെല്ലാം തന്നെ ടി.വിയുടെ ആയുസ്സ് (LIFE TIME) കുറയ്ക്കുന്ന ഘടകങ്ങളാണെന്ന വസ്തുത പ്രത്യേകം ശ്രദ്ധയിൽ കൊള്ളുക.

2. നിങ്ങൾ താമസിക്കുന്ന സ്ഥലത്ത് വോൾട്ടേജ് വ്യതിയാനം ഇടയ്ക്കിടെ അനുഭവപ്പെടുന്നുണ്ടെങ്കിൽ നിങ്ങളുടെ ടി.വിയെ അത് ബാധിക്കും. അതൊഴിവാക്കാനായി ടി.വി വോൾട്ടേജ്റെ ഗുലേറ്റർ (സ്റ്റെബിലൈസർ) ടി.വിയുമായി ബന്ധിപ്പിക്കണം.

3. ചില വീടുകളിൽ ടി.വിയിൽ നിന്നുവരുന്ന പ്രകാശത്തെ കൂടിയ തോതിൽ വച്ചിട്ടാകും ടി.വി കാണുന്നത്. ഇതും ടി.വിയുടെ ആയുസ്സ് കുറയ്ക്കുമെന്ന് മാത്രമല്ല ടി.വി കാണുന്ന നിങ്ങളുടെ കണ്ണുകൾ പെട്ടെന്ന് ക്ഷീണിക്കാനും ഇടയുണ്ട്.