ഒരു റിവേഴ്സ് മൈഗ്രേഷൻ നായിക

ശ്രദ്ധിക്കപ്പെട്ട ചിത്രങ്ങളുടെ ഭാഗമാണെങ്കിലും തനിക്കുണ്ടാകുന്ന നീണ്ട ഇടവേളകളെക്കുറിച്ച് വിമലാരാമൻ മനസ്സ് തുറക്കുന്നു

- അപ്പൂസ് കെ.എസ്

2008 ൽ കൽക്കട്ടാ ന്യൂസ് എന്ന ചിത്രത്തിനു ശേഷം 2016 ൽ ഒപ്പം സിനിമ.. എങ്ങനെയാണ് കരി യറിൽ ഇത്രയും ഇടവേള വന്നത്? ഇപ്പോൾ വീണ്ടും കേരളത്തിൽ എത്തിനിൽക്കുമ്പോൾ എന്ത് തോന്നുന്നു ?

എനിക്കൊരുപാട് സന്തോഷമാണ് തോന്നുന്നത്. എന്തെന്നാൽ എനിക്ക് മലയാള സിനിമാ മേഖല ഒരുപാട് പ്രിയപ്പെട്ടതാണ്. എന്നെ ആളുകൾ അറിയുന്ന മികച്ച ഒരു നായികയാക്കി മാറ്റിയത് മലയാളം ഫിലിം ഇൻഡസ്ട്രിയാണ്.

ഓസ്ട്രേലിയയിൽ നിന്നും നാട്ടിലേക്ക് വന്നു ഇവിടെ സെറ്റിൽ ചെയ്തതാണ് താങ്കൾ. സാധാരണഗതിയിൽ മലയാളികൾ കേരളം വിട്ട് വിദേശത്തുപോയി സെറ്റിൽ ചെയ്യുന്നതാണല്ലോ പതിവ്. എന്താണ് ഈ റിവേഴ്സ് മൈഗ്രേഷനുള്ള കാരണം?

ഞാൻ ജനിച്ചതും വളർന്നതുമെല്ലാം ഓസ്ട്രേലിയയിലാണ്. സിനിമയിൽ അഭിനയിക്കണം എന്നുതന്നെയാണ് എന്റെ ആഗ്രഹം. അതിനുവേണ്ടിയാണ് ഞാൻ ഇന്ത്യയിലേക്ക് വരുന്നത്. ഇന്ത്യൻ സിനിമ എനിക്ക് എല്ലാകാലത്തും പ്രിയപ്പെട്ടതാണ്. ഇവിടുത്തെ സംസ്ക്കാരം, ആളുകൾ എല്ലാം എനിക്കേറെ ഇഷ്ടമാണ്. ഒരു ഭരതനാട്യം നർത്തകി എന്ന നിലയിലും എനിക്ക് ഇന്ത്യ പ്രിയപ്പെട്ടതാണ്. ഇവിടെ വന്നതിനു ശേഷമാണ് ഞാൻ മോഡലിംഗ് അസൈൻമെന്റുകൾ ചെയ്യുന്നത്.

ഐ.ടി മേലയിൽ നിന്നും ഭരതനാട്യം, മോഡ ലിംഗ്, പിന്നെ സിനിമ.. താങ്കളുടെ ഇഷ്ടങ്ങൾ കുറചധികം വൈവിധ്യമുള്ളതാണ്?

അതെ, അടിസ്ഥാനപരമായി ഞാനൊരു പെർഫോമിംഗ് ആർട്ടിസ്റ്റാണ്. ചെറിയ പ്രായം മുതലെ ഞാൻ അതുമായി ബന്ധപ്പെട്ട കാര്യങ്ങളിൽ ഉത്സുകയായിരുന്നു. അപ്പോൾ മുതൽ തന്നെ നാടകം, ക്വയർ, ജിംനാസ്റ്റിക്, ഭര തനാട്യം ഇതെല്ലാം ഞാൻ വളരെ ചെറിയ പ്രായം മുതലെ അഭ്യസിച്ചിരുന്നു. ഇതെല്ലാം എന്റെ അഭിനയത്തിലേക്കുള്ള നാഴികക്കല്ലുകളായിരുന്നു.

സിനിമാമേഖലയിൽ ഏറെ കേട്ടിട്ടുള്ള ഒന്നാണ് കാസ്റ്റിംഗ് കൗച്ച്. വിമലയ്ക്ക് സിനിമാമേ ഖലയിൽ നിന്നും അതുമായി ബന്ധപ്പെട്ട എന്തെങ്കിലും മോശം അനുഭവങ്ങൾ ഉണ്ടായിട്ടുണ്ടോ?

കാസ്റ്റിംഗ് കൗച്ച് സിനിമ മേഖലയിൽ നിലനിൽക്കുന്നുണ്ട്. പക്ഷേ എനിക്ക് അതുപോലെയുള്ള അനുഭവങ്ങൾ ഉണ്ടായിട്ടില്ല. ഇത് സിനിമാമേഖലയിൽ മാത്രം ഉള്ളതാണ് എന്ന് പറയാനാവില്ല. സിനിമ പോലെയുള്ള പല മേഖലകളിൽ ഇത് കണ്ടുവരുന്നുണ്ട്. പക്ഷേ ഇന്നത്തെക്കാലത്ത് അത് കുറഞ്ഞു വരുന്നുണ്ട് എന്ന് വിശ്വസിക്കാനാണ് എനിക്കിഷ്ടം.