ദൈവത്തിന്റെ സമ്മാനം

ബെംഗളൂരുവിലെ വീട്ടിൽ പ്രണയത്തിന്റെ രണ്ടാം ഭാവം ആഘോഷിക്കുകയാണു ലെനയും പ്രശാന്തും

- രൂപാ ദയാബ്ജി

ആറു വർഷം മുൻപു 'വനിത'യ്ക്കു വേണ്ടി ലെനയോടു സംസാരിക്കുമ്പോൾ "എങ്ങനെ ഇത് എനർജി കിട്ടുന്നു' എന്നു ചോദിച്ചിരുന്നു. “ഒന്നും പ്ലാൻ ചെയ്യാതെ ജീവിക്കുന്നതിന്റെ സന്തോഷം തരുന്ന എനർജിയാണിത്' എന്നായിരുന്നു ലെനയുടെ മറുപടി. ലെന അന്നു പറഞ്ഞു, “ദൈവത്തിന്റെ സമ്മാനം എന്നൊന്നുണ്ടെന്നാണു ഞാൻ വിശ്വസിക്കുന്നത്. നമ്മൾ പ്ലാൻ ചെയ്യുന്നതിനേക്കാൾ മനോഹരമായ അനുഭവങ്ങളാകും ജീവിതം തിരിച്ചുതരിക. അപ്പോഴേ അത് ആസ്വദിക്കാനാകൂ.

ലെനയും ഇന്ത്യയുടെ ബഹിരാകാശ യാത്രികനായി തിരഞ്ഞെടുക്കപ്പെട്ട പ്രശാന്ത് ബി. നായരും വിവാഹിതരായ വാർത്ത വന്ന ദിവസം ഇക്കാര്യം പറഞ്ഞാണു സംസാരം തുടങ്ങിയത്. "ആറു വർഷം മുൻപു സംസാരിച്ച കാര്യം ഈ നിമിഷത്തിലാണല്ലോ ഓർമ ഉള്ളത്. ആ ഓർമ ഈ നിമിഷത്തിൽ ഇല്ലെങ്കിൽ ആ ഓർമ ഇല്ല...ആ സ്പിരിച്വൽ അവലോകനത്തിനു ശേഷം ലെന ഉറ പ്പു നൽകി, "എല്ലാ വിശേഷ പറയാം. ഒരുപാടു വൈകാതെ തന്നെ.

ഇന്ത്യയുടെ അഭിമാന ബഹിരാകാശ പദ്ധതി ഗഗൻയാന്റെ ഭാഗമായി അമേരിക്കയിലെ ഇന്റർനാഷനൽ സ്പേസ് സ്റ്റേഷനിലേക്കു പരിശീലനത്തിനു തിരഞ്ഞെടുക്കപ്പെട്ട രണ്ടുപേരിൽ പ്രശാന്ത് ബി. നായരുമുണ്ട്. വനിതയുടെ ഓണപ്പതിപ്പിനു വേണ്ടി ലെനയാണു സംസാരിച്ചത്. സുരക്ഷാ നിർദേശങ്ങൾ പാലിക്കേണ്ടതിനാൽ പ്രശാന്തിനു മാധ്യമങ്ങളോടു സംസാരിക്കാനാകില്ല.

ആ രഹസ്യം, വിവാഹം

പന്ത്രണ്ടു വർഷം സിംഗിളായി ജീവിച്ച, ഇനിയൊരിക്കലും വിവാഹം കഴിക്കില്ലെന്നു തീരുമാനിച്ചിരുന്ന തന്റെ ജീവിതത്തിൽ സംഭവിച്ചതെല്ലാം പെട്ടെന്നാണ് എന്നു പറഞ്ഞാണ് ലെന സംസാരം തുടങ്ങിയത്. “ഞാനെഴുതിയ "ഓട്ടോബയോഗ്രഫി ഓഫ് ഗോഡ്' എന്ന പുസ്തകം പ്രസിദ്ധീകരിച്ച പിറകേ നൽകിയ അഭിമുഖത്തോടൊപ്പം വന്ന വിഡിയോ വൈറലായതിൽ നിന്നാണു തുടക്കം.

"കഴിഞ്ഞ ജന്മത്തിൽ ഞാനൊരു ബുദ്ധ സന്യാസിയായിരുന്നു' എന്നൊക്കെയുള്ള പരാമർശങ്ങൾ അതിലുണ്ടായിരുന്നു. സ്പിരിച്വാലിറ്റിയെ കുറിച്ച് അന്നുവരെ പറഞ്ഞിട്ടില്ലാത്ത കാര്യങ്ങൾ ഉള്ളതു കൊണ്ടാകാം കുറേ ട്രോളുകളും റീലുകളും പിന്നാലെ വന്നു. സിനിമാക്കാരുടെ ഇന്റർവ്യൂ കാണുക പോലും ചെയ്യാത്ത കുറേ പേരുണ്ടെന്ന് എനിക്കു മനസ്സിലായത് അതിനു ശേഷമാണ്. അക്കൂട്ടത്തിൽ ഒരാളാണു പ്രശാന്തേട്ടനും.