வளர்ச்சிப் பணிகளில் துணை முதல்வர் உதயநிதி ஸ்டாலின்...

தமிழகத்தின் மூன்றாவது துணை முதல்வரான உதயநிதி அடியெடுத்து வைத்துள்ளார்.

கடந்த 1977ம் ஆண்டு நவம்பர் 27ம் தேதி, தற்போதைய தமிழக முதல்வர் மு.க.ஸ்டாலின் மற்றும் துர்க்கா தம்பதியினருக்கு மகனாக பிறந்தவர் உதயநிதி.

சென்னை லயோலா கல்லூரியில் பி.எஸ்சி முடித்துவிட்டு, அமெரிக்காவில் எம்பிஏ பயின்றார். பின்னர் சென்னையில் ஸ்னோ பவுலிங் மையத்தை நண்பர்களுடன் சேர்ந்து ஆரம்பித்தார். 2002ம் ஆண்டு கிருத்திகாவைக் காதலித்து மணமுடித்தார். தற்போது இவர்களுக்கு இரு குழந்தைகள் உள்ளனர்.

2007-2008ம் காலக்கட்டத்தில் 'ரெட் ஜெயண்ட் மூவிஸ்' நிறுவனத்தைத் தொடங்கி, படங்களைத் தயாரித்தார். கூடவே, பல படங்களை விநியோகமும் செய்தார்.

இதற்கிடையே, 2012ம் ஆண்டு 'ஒரு கல் ஒரு கண்ணாடி' மூலம் நடிகராக அறிமுகமானார். படத் தயாரிப்பு, விநியோகம், நடிப்பு எனப் பன்முகத் தன்மையுடன் பணியாற்றினார்.