വിജയ് സൂപ്പർ; ലാലേട്ടൻ ഗുരു

മലയാളത്തിലും തമിഴിലും തെലുങ്കിലും ഒരേപോലെ തിളങ്ങിയ നായികയാണ് ലക്ഷണ. സൂപ്പർസ്റ്റാർ വിജയുടെയും മോഹൻലാലിന്റെയും മമ്മൂട്ടിയുടെയും ഒപ്പം അഭിനയിച്ച ലക്ഷണ വിവാഹത്തോടെ വെള്ളിത്തിരയിൽ നിന്നും ബ്രേക്കെടുത്തു. 15 വർഷത്തെ ഇടവേളയ്ക്കു ശേഷം ലക്ഷണ നൃത്ത രംഗത്ത് സജീവമാവുകയാണ്. ഒപ്പം സിനിമയിൽ ശക്തമായ കഥാപാത്രങ്ങൾക്കായി കാത്തിരിക്കുകയും ചെയ്യുന്നു. ലക്ഷണയുടെ വിശേഷങ്ങൾ വെള്ളിനക്ഷത്രത്തോട് പങ്കുവയ്ക്കുന്നു...

സിനിമയിൽ നിന്നും ബ്രേക്കെടുത്തത് എന്തിനായിരുന്നു? വിവാഹ ശേഷം ഞാൻ ഖത്തറിൽ സെറ്റിൽഡാണ്. അവിടെ ഒരു നൃത്ത വിദ്യാലയം നടത്തുന്നുണ്ട്. നല്ല രീതിയിൽ സ്കൂൾ മുന്നോട്ടു പോകുന്നുണ്ട്. ഇതിനിടയിൽ നമുക്കറിയാവുന്ന സംവിധായകരൊക്കെ അഭിനയിക്കാൻ വിളിക്കുന്നുണ്ട്. അതൊരു വലിയ ഭാഗ്യമാണ്. അവർ എന്നെ മറന്നിട്ടില്ലെന്നതിന്റെ തെളിവാണത്. പക്ഷേ ഖത്തറിൽ നിന്നും ഇവിടേക്കു വന്ന് അഭിനയിക്കുന്നതിന് ചില ബുദ്ധിമുട്ടുകളുള്ളതിനാലാണ് പല അവസരങ്ങളും നിരസിച്ചത്. രണ്ടു മക്കളുണ്ട്. അവരുടെ കാര്യങ്ങൾ നോക്കണം. രണ്ടാമത്തെ മകന് മൂന്നര വയസേ ആയിട്ടുള്ളു. മൂത്തമകൾക്ക് 12 വയസായി. അവരെയൊക്കെ നോക്കണം. ആ ഒരു ബുദ്ധിമുട്ടുള്ളതിനാലാണ് ഞാനൊരു ബ്രേക്കെടുത്തത്.

നൃത്തത്തിലേക്ക് തിരിച്ചുവരാൻ കാരണം?

 ഞാൻ നേരത്തെ ഒരു നർത്തകിയായിരുന്നു. അതാണ് എന്റെ മേഖല. സിനിമ ചെയ്യുന്ന സമയത്ത് ഡാൻസ് പെർഫോമൻസ് ചെയ്യാൻ സമയം കിട്ടിയിരുന്നില്ല. പ്രോഗ്രാമുകളും ചെയ്തിരുന്നില്ല. പിന്നെ അന്നൊന്നും ഇത്തരം അവസരങ്ങളും ഉണ്ടായിരുന്നില്ല. 15 വർഷം മുമ്പുള്ള കാര്യമാണ് പറയുന്നത്. ഇപ്പോൾ കാര്യങ്ങൾ അങ്ങനെയല്ല. കൂടുതൽ അവസരങ്ങളുണ്ട്. ഡാൻസ് പ്രോഗ്രാമുകൾ ചെയ്യണമെന്നുണ്ട്. ഖത്തറിലും ഡാൻസ് സ്കൂളാണ് നടത്തുന്നത്.

വിവാഹ ശേഷം അവസരങ്ങൾ വന്നിട്ടും നിരസിക്കാൻ കാരണം? ഞാൻ നേരത്തെ പറഞ്ഞല്ലോ, വിവാഹശേഷം ഖത്തറിൽ സെറ്റിൽഡായി. പിന്നെ രണ്ടു മക്കളുണ്ട്. ആദ്യത്തെ മകൾ ഒന്നു വലുതായ ശേഷം സിനിമയിലേക്കു തിരിച്ചു വരാമെന്നു കരുതിയിരുന്നതാണ്. എന്നാൽ പ്രതീക്ഷിക്കാതെ രണ്ടാമത്തെ മകനും പിറന്നു. അവന് മൂന്നര വയസേ ആയിട്ടുള്ളു. അവൻ സ്കൂളിൽ പോകുന്ന പ്രായമാകുമ്പോൾ സിനിമയിലേക്കു തിരിച്ചു വരാമെന്നാണ് കരുതിയത്.