સત્યમેવ જયતે

જો માબાપો પહેલાં વિઝા મેળવે પછી એમનાં સંતાનો વિઝાની અરજી કરે તો વિઝા આપવામાં નથી આવતા, પણ માબાપોને અપાયેલ વિઝા પણ તેઓ કેન્સલ કરે છે

- ડો.સુધીર શાહ

‘નહીં, નહીં, તમે બધા જો વિઝાની અરજી સાથે કરશો તો એ રીજેક્ટ થશે. એમ કરો તમે ને તમારા વાઇફ બી-૧ બી-૨ વિઝાની અરજી પહેલા કરો. એટલે ઇન્ટરવ્યૂમાં તમે કહી શકો કે, ‘સર, અમારાં બે સંતાનોને અહીં ઇન્ડિયામાં જ મારી મધરની પાસે મૂકીને અમે જઈએ છીએ એટલે જરૂરથી પાછા આવીશું.’ તમને દસ વર્ષના મલ્ટિએન્ટ્રી બી-૧/બી-૨ વિઝા મળી જાય પછી તમારા બેઉં બાળકો માટે અરજી કરજો. એટલે તેઓ પણ ‘અમે ટૂરમાં ફરવા જઈએ છીએ, અમારા પેરેન્ટ્સ તો અહીંયાં જ છે.’ એવું જણાવતા એમને પણ ટૂરિસ્ટ વિઝા મળી જશે. નિડયાદના નટવરભાઈ જેઓ વર્ષોથી વિઝા કન્સલ્ટન્ટનું કામ કરતા હતા એમણે એમના એક ક્લાયન્ટને આવી સલાહ આપી.

આવી છેતરપિંડી આચરવાનું અનેક વિઝા કન્સલ્ટન્ટો એમના ક્લાયન્ટોને સૂચવતા હોય છે. જો આખું ફેમિલી એક સાથે બી-૧/બી-૨ વિઝાની અરજીની માગણી કરે તો કોન્સ્યુલર ઓફિસરને એવું લાગી શકે કે તેઓ પાછા ઇન્ડિયા નહીં આવે. જો બાળકોને મૂકીને માબાપો અરજી કરે અને એમને વિઝા મળી જાય પછી બાળકો એકલા અરજી કરે તો વિઝા મળવાના ચાન્સીસ વધી જાય. આ ધારણા આમ તો સાચી છે, પણ અનેકો આવું કરતાં થયા એટલે હવેથી કોન્સ્યુલર ઓફિસરો એકદમ સતર્ક થઈ ગયા છે. વિઝા કન્સલ્ટન્ટો જે આવી છેતરપિંડી સૂચવે છે એનાથી તેઓ જાણકાર થઈ ગયા છે. જો માબાપો પહેલાં વિઝા મેળવે અને પછી એમનાં સંતાનો વિઝાની અરજી કરે તો એમને તો વિઝા આપવામાં નથી આવતા, પણ એમનાં માબાપોને આપવામાં આવેલ વિઝા પણ તેઓ કૅન્સલ કરે છે.