વિઝા વિમર્શ,

રિપબ્લિકન નોમિની ડોનાલ્ડ ટ્રમ્પ

- ડો.સુધીર શાહ

અમેરિકાના પ્રેસિડન્ટોની સમયમર્યાદા ચાર વર્ષની હોય છે. એક વ્યક્તિ બેથી વધુ વાર અમેરિકાનું પ્રેસિડન્ટ પદ ભોગવી નથી શકતો. ડોનાલ્ડ ટ્રમ્પ જેઓ રિપબ્લિક પાર્ટીના નૉમિની છે, એમણે વર્ષ ૨૦૧૬ના પ્રેસિડેન્શિયલ ઇલેક્શનમાં જીત મેળવીને ચાર વર્ષ સુધી એ પદ ભોગવ્યું હતું.

એમણે નવ મુસ્લિમ દેશોના લોકોને અમેરિકામાં પ્રવેશ ન આપવો એવા એક્ઝિક્યુટિવ ઑર્ડરો બહાર પાડ્યા હતા. અમેરિકા અને મેક્સિકોની સરહદ ઉપરની દીવાલને મોટી કરી અને સરહદ ઉપર જ ફૅમિલી સેપરેશન પૉલિસી દાખલ કરી હતી. સો જેટલી પર્યાવરણને લગતી પૉલિસીઓ અને રેગ્યુલેશનો એમણે પાછા ખેંચી લીધા હતા. ટૅક્સ કર્ટસ એન્ડ જોબ્સ ઍક્ટ, ૨૦૧૭ દાખલ કર્યો અને સુપ્રીમ કોર્ટમાં ત્રણ જજોને નીમ્યા હતા. ચાઇના જોડે વ્યાપારિક ધોરણે યુદ્ધ શરૂ કર્યું. અનેક ઇન્ટરનેશનલ એગ્રીમૅન્ટોમાંથી અમેરિકાને પાછું ખેંચી લીધું હતું. કોવિડ૧૯ના ભયંકર રોગચાળા વખતે કૅર ઍક્ટ દાખલ કર્યો હતો. સત્તાનો ગેરઉપયોગ અને કોંગ્રેસની કાર્યવાહીમાં વિઘ્નરૂપ બનવા માટે વર્ષ ૨૦૧૯માં એમના ઉપર તહોમત મૂકીને એમને ઇમ્પીચ કરવામાં આવ્યા હતા, પણ અમેરિકાની સેનેટે એમને એમાંથી મુક્ત કર્યા.

ડોનાલ્ડ ટ્રમ્પ માટે એવું કહેવામાં આવે છે કે, તેઓ રેસીસ્ટ છે અને ઇતિહાસકારો અને સ્કોલરોએ એમના એ પ્રેસિડન્ટપણા માટે એવું જણાવ્યું કે, અમેરિકાના ઇતિહાસમાં તેઓ સૌથી ખરાબ પ્રેસિડન્ટ હતા. આવા ડોનાલ્ડ ટ્રમ્પ એકવાર ફરીથી અમેરિકાના પ્રેસિડન્ટ પદ માટે ચૂંટાઈ આવ્યા છે અને ૨૦મી જાન્યુઆરી, ૨૦૨૫ના તેઓ રિપબ્લિક પાર્ટીના નૉમિની તરીકે વોશિંગ્ટન ડીસીમાં આવેલ અમેરિકાના પ્રેસિડન્ટના નિવાસસ્થાન વ્હાઇટ હાઉસમાં પ્રવેશ કરશે.