સોશિયલ મીડિયાનો પ્રેમાલાપ

વૉટ્સઍપ, ફેસબુક, ઇન્સ્ટાગ્રામ કે ટ્વિટર જેવાં સોશિયલ મીડિયા પ્લેટફોર્મ્સ એમ જુઓ તો આજે નફરત અને નકારાત્મકતા ફેલાવવા માટે બદનામ થઈ ગયાં છે, પરંતુ તેનો શરૂઆતનો અને મુખ્ય આશય તો લોકોને એકબીજાથી નજીક લાવવાનો જ હતો. એવી બાબતો જે તમે ઘરમાં એકબીજાને ન કહી શકતા હોવ તે સોશિયલ મીડિયામાં શરમ નેવે મૂકીને આસાનીથી કહી શકાતી હોય છે. તમારા ડીપીમાં કે પિનપોસ્ટમાં રહેલી વ્યક્તિ તમારા માટે કેટલી અગત્યની છે એ દર્શાવે છે.

- ડો. મિતાલી સમોવા

યક્ષિણી એસજી હાઈવેથી રિંગરોડ જતાં વચ્ચે શહેરની ભીડભાડ અને બખાળાથી દૂર રમણીય અને શાંત એવા ઓપન ગાર્ડન ક્રિષ્ટલ કાફેમાં કોઈકની રાહ જોઈ રહી હતી. પૉટેન્શિયલ મુરતિયાને એક લગ્ન સાઇટ પરથી પસંદ કરીને મળવાનું ગોઠવાયું હતું. મુરતિયાભાઈ બહારગામથી આવવાના હતા. બાજુના ટેબલ પર એક યુવા પ્રેમીયુગલ એમના લાડપ્રેમમાં મશગૂલ હતું. અચાનક યુગલમાંની છોકરીએ ધડ દઈને પાણીનો પ્લાસ્ટિકનો ગ્લાસ જમીન ઉપર પછાડ્યો. યક્ષિણી અને બાકીનો કાફે સ્ટાફ એની બાજુ જુએ એટલામાં તો છોકરી ત્યાં જ બે હાથ વચ્ચે મોઢું સંતાડીને રડવા લાગી. છોકરો ગૂંચવણમાં એને શાંત પાડવાનો પ્રયાસ કરી રહ્યો હતો. યક્ષિણીને લાગ્યું કે મદદ કરવી જોઈએ. એ ઊભી થઈને એ બંનેની પાસે ગઈ. છોકરાને પૂછ્યું કે શું થયું? જેના જવાબમાં એણે ખભા ઉલાળ્યા અને દયામણું મોઢું કરી દીધું.