અમારા ફ્લેટનું નામ ‘કોન્ટ્રાક્ટર કૃપા’ છે!

‘અરે યાર, કોરી જગાએ બેસવા માટે તો ઘણા બધા દિવસો છે. આમ આ રીતે શીતળ જળછંટકાવ થતો હોય અને તેય પાછું ઘરની અંદર જ - આવો લહાવો તો ક્યારેક જ મળે'

- હર્ષદ પંડ્યા ‘શબ્દપ્રીત’

ક્યારેક વાઇફ મને ફરિયાદ કરતી હોય છે કે ‘તમે તો કેવા કંજૂસ છો, કોઈ દિવસ અમને વૉટરપાર્ક જોવા પણ લઈ જતા નથી.’ ત્યારે અમે નિત્ય સ્મરણીય કોન્ટ્રાક્ટરશ્રીને યાદ કરીને જવાબ આપીએ છીએ કે, ‘ગાંડી, જેના ઘરમાં જ વૉટરપાર્કની આટલી સુંદર વ્યવસ્થા કોન્ટ્રાક્ટરે નિઃસ્વાર્થભાવે કરી આપી હોય તે જોવાનું મૂકીને બહારના વૉટરપાર્ક જોવાનું ગાંડપણ તને કેમ થયું?’ આમ કહીને અમે તેને મનાવી લઈએ છીએ. પછી ઝરમર ઝરમર વરસતા વરસાદમાં અમે એને અમારા ધાબા પર – (અમારું ધાબું એટલે.. મકાનનું ધાબું! જોકે આમેય અમારા માથે છાપરું રહ્યું જ નથી ધાબું જ થઈ ગયું છે) લઈ જઈએ છીએ અને ધાબા પર ભરાઈ ગયેલી નાની નાની તલાવડીઓ બતાવીએ છીએ અને ગર્વથી કહીએ છીએ કે, “જો આ આપણું દાલ સરોવર, પેલું આપણું નખી સરોવર અને અહીં પગ પાસે દેખાય છે તે આપણું ‘નળ’ સરોવર.” જોકે અમારું નળ-સરોવર તો વગર ચોમાસે પણ સોળે કાંઠે ભરાયેલું જ રહે છે, કારણ કે ધાબા પરની ટાંકીનો મેઇન નળ હંમેશાં શરદીનો દરદી હોવાથી ટપકતો જ રહે છે.

અમારા ધાબા પર ત્રણ ત્રણ સરોવરોનું વરદાન અમને ફળ્યું છે. અમારા પરમ કૃપાળુ બિલ્ડરો અને કોન્ટ્રાક્ટરોના સહિયારા આશીર્વાદને કારણે જ! આ સરોવરોમાં હંસો તરતાં દેખાય નહીં એટલું જ બાકી રહ્યું છે અને એ તો એવું છે ને કે ઘરઆંગણે ત્રણ ત્રણ સરોવરોની સુવિધા જોઈતી હોય તો કેટલુંક જતું પણ કરવું પડે. આનાથી વધારે અપેક્ષાઓ કોન્ટ્રાક્ટર પાસેથી રાખીએ એ પણ વાજબી ન કહેવાય. જેમ શોભતું હોય એમ શોભે.

હમણાં જ - થોડા દિવસ પહેલાં અમારો મિત્ર બાબુ બૉસ તેના પરિવાર સાથે અમારા ઘરે આવ્યો. ચા-નાસ્તો કરતાં કરતાં એણે વાઇફને પૂછ્યું, ‘ભાભી, તમે આ વૉલ પોસ્ટર ક્યાંથી લાવ્યા?’

‘લાવ્યા નથી, ખરીદ્યું છે.’ વાઇફે ત્રાંસી નજરે મારી સામે જોઈને કહ્યું.

‘ક્યાંથી ખરીદ્યું? મારે પણ ખરીદવું છે.’ બાબુએ જિજ્ઞાસા બતાવી.

‘પૂછો તમારા ભાઈબંધને.’