ગણપતિદાદાને એક પત્ર...

પહેલાં તો એકાદ ઉંદરને જોઈ અમે ખુશ થતા કે બાપાની મહેરબાની છે, પણ તમારાં વાહનો પરિવાર નિયોજનની પકડમાં નહીં આવવાથી ઉંદરોનો ટ્રાફિક વધવા માંડ્યો

- હર્ષદ પંડ્યા ‘શબ્દપ્રીત'

હે ગણપતિદાદા, તમે અમને કુશળ રાખો છો છતાં આજે હું તમને કહું છું કે કુશળ હશો! પત્રની શરૂઆતમાં આવું જ લખવું પડે બાપા...!

હમણાં તમારા દિવસો ચાલે છે, પણ દાદા, મને એક વાત નથી સમજાતી અને તે એ કે તમારા સપરિવારમાં તમે સૌથી નાના તોય મંગલકાર્યની શરૂઆતે તમારા બાપુજીનું પૂજન નહીં, તમારાં પૂ. પાર્વતીબાનું પૂજન નહીં અને તમે સૌથી નાના તોય તમારું આટલું બધું મહત્વ કેમ? કે પછી તમારે ત્યાં પણ અમારા રાજકારણ કે સરકારીકરણ જેવું જ છે? સિનિયોરિટી જળવાતી જ નથી?

પ્રદૂષણ ન ફેલાય તે માટે થઈને પેટ્રોલ કે સી.એન.જી. વગર ચાલતાં વાહન તરીકે ઉંદર પર જ તમે પસંદગી ઉતારી. અમારા પ્રધાનોને અને શ્રીમંતોને આ અંગે થોડી શિખામણ આપજો દાદા. એવું કહેવાય છે કે ચીનના લોકો તો તમારા વાહનથી જ પેટનો ખાડો પૂરતા હોય છે. એ લોકો તો ઉંદરથી ઉદર ભરી લેતાં હોય છે!

હમણાં હમણાં તો દાદા અમેરિકાના ચોર લોકો પણ તમારા આ ‘ઉંદરવાન’નો ઉપયોગ કરતા થઈ ગયા છે. એ ચોર લોકો શું કરે છે, ખબર છે? લ્યો બાપા... હું યે કેવો ગાંડો સવાલ કરું છું? એ તો હું જેવો હોઉં, એવો જ સવાલ કરું ને? તમે તો અંતર્યામી છો એટલે બધું જાણતા જ હશો, પણ છતાંય તમે કશું જ નથી જાણતા એમ માનીને કહ્યું, કે પેલા ચોર લોકો કોઈ એકલદોકલ મહિલાની કારમાં એક જીવતો ઉંદર મૂકી દે છે અને જેવી કાર સ્ટાર્ટ કરે કે તરત તમારું વાહન પેલી કારમાં જ રાઉન્ડ મારવાનું શરૂ કરે... આ જોઈને પેલી મહિલા ગભરાટની મારી બારણું ખોલી બહાર નીકળી જાય. પછી પેલો ગઠિયો બિલાડીની ઝડપે કારનું બારણું ખોલી કાર હંકારી જાય ત્યારે જ પેલી મહિલાને ભાન થાય કે ઊતરતી વેળાએ કારની ચાવી કાઢી લેવાનું તો એ ભૂલી ગઈ હતી!

જોયું ને બાપા... ઉંદર સાથે કેવી રમત રમાય છે! આપણા ભારત મધ્યે આવેલા મુંબઈમાં તો તમારા આ ઉંદરો જ બેકાર યુવાઓની બેકારી ઓછી કરવા માટે જાતનું બલિદાન આપવા તૈયાર થઈ ગયા'તા! કહેવાય છે કે વર્ષો પહેલાં મુંબઈમાં ઉંદરોની સંખ્યા વધારે છે કે બેકારોની, એનો અંદાજ કાઢવા ત્યાંની મહાનગરપાલિકાએ ઉંદરોને મારવા માટે... ઓહ! રામ, રામ, રામ… એમને મોક્ષ આપવા માટે ૭૦થી ૭૫ જેટલા મોક્ષદાતાઓ માટે છાપામાં જાહેરખબર આપી હતી. એના જવાબમાં બાપા, પાંત્રીસ હજાર જેટલા મારણહારો'ની અરજીઓ આવી હતી.