ઉત્તર ગુજરાત ચૂંટણીમાં પણ મધ્યસ્થ ભૂમિકા ભજવશે?

ગુજરાત વિધાનસભાની ચૂંટણી જેમ જેમ નજીક આવતી જાય છે એમ એમ રાજકીય વાતાવરણ રંગ પકડી રહ્યું છે. આ વખતે જેની શક્યતા છે એ ત્રિકોણિયા જંગને કારણે મતદારોમાં પણ ભારે ઉત્સુકતા જોવા મળી રહી છે. બદલાયેલી આર્થિક-રાજકીય પરિસ્થિતિનો લાભ લેવા દરેક પક્ષ સક્રિય છે, તો સાથે સાથે રાજ્યનું પ્રાદેશિક વૈવિધ્ય પણ દરેક પક્ષની વ્યૂહરચના ઉપર કેવો પ્રભાવ પાડી શકે છે એની ચર્ચા અહીં વિગતવાર માંડવામાં આવી છે.

ગત અઠવાડિયે ગુજરાતી ટીવી ચેનલ્સ પર નાટકીય દશ્યો ચાલ્યાં. મધરાતે એક બંગલામાં કેટલાંક વાહનો પ્રવેશ્યાં અને થોડી વાર પછી રવાના થયાં. સીસીટીવી ફૂટેજ સાથે સમાચાર ચાલ્યા કે વિપુલ ચૌધરીની ધરપકડ કરવામાં આવી છે. વર્ષો જૂના કેસમાં મધરાતે ધરપકડથી આશ્ચર્ય થવાનું, કેમ કે આ કોઈ ફોજદારી બાબત નહોતી કે આરોપીને ઊંઘતા ઝડપી લેવો પડે. નાણાકીય ગેરરીતિના આરોપો વચ્ચે કોઈ મહત્ત્વના નેતાની ધરપકડ થાય ત્યારે તેના રાજકીય પડઘા પડે એ સ્પષ્ટ છે. તેમની ધરપકડ સામે અર્બુદા સેનાના ટેકેદારોએ ધમાલ પણ કરી અને કેટલાંક ગામોમાં ભાજપ પ્રવેશબંધીનાં બોર્ડ પણ લાગ્યાં.

વિપુલ ચૌધરી એટલે દૂધસાગર ડેરીના સંચાલક. ડેરીના કારોબારમાં જ તેમણે કરોડો રૂપિયાના કૌભાંડ કર્યાના આરોપો મૂકાયા છે. જૂના લોકો વિપુલ ચૌધરીને આશાસ્પદ યુવા નેતા તરીકે પણ યાદ કરે છે. ત્રણેક દાયકા પહેલાં ત્રણ યુવાનો ચર્ચામાં હતા - ચીમનભાઈના સાથી નરહિર અમીન, શંકરસિંહના સાથી વિપુલ ચૌધરી અને નરેન્દ્ર મોદીના સાથી અમિત શાહ. દૂધસાગર ડેરીના સંસ્થાપક માનસિંહભાઈ પટેલનો સહકારી ક્ષેત્ર ઉપરાંત રાજકીય વારસો પણ વિપુલ ચૌધરીને મળ્યો હતો.

એક હજુરિયા-ખજુરિયા કાંડમાં અનેકની કારકિર્દી રોળાઈ ગઈ તેમાં વિપુલભાઈ પણ ખરા. શંકરસિંહ સાથે ગયા અને બાદમાં ભાજપમાં પાછા ફર્યા. એક બેસતા વર્ષે તેઓ નરેન્દ્ર મોદીને પગે લાગ્યા તે દશ્યો પણ ટીવી પર ડ્રામેટિક રીતે પેશ થયાં હતાં. વિપુલ ચૌધરી પગે પડ્યા, પણ સામાય પડી શકે તેવી સ્થિતિમાં તેમને ઠેકાણે પાડી દેવાયા તેવી ચર્ચા છે. તેના કારણે ઉત્તર ગુજરાતની ૨૦ બેઠકો પર અસર થશે તેવી ચર્ચા થઈ.

ઉત્તર ગુજરાતની ચર્ચા

રાજ્યની ચૂંટણીની વાતમાં પ્રાદેશિક એકમોની અલગથી ચર્ચા થાય. ગુજરાતમાં ચાર મુખ્ય રાજકીય એકમો છે - ઉત્તર અને દક્ષિણ ગુજરાત, મધ્ય ગુજરાત અને સૌરાષ્ટ્રકચ્છ. આ દરેકના પેટા વિભાગો પણ છે અને તેની ગણતરી જુદી થતી હોય છે, પણ મુખ્યત્વે પ્રદેશવાર ગણતરી થાય. ૨૦૧૭ અને તે પછીથી સૌરાષ્ટ્ર અને સુરત ધ્યાન ખેંચતા રહ્યા છે, પણ છેલ્લા થોડા મહિનાની ઘટનાઓથી ઉત્તર ગુજરાત પણ ચર્ચામાં આવ્યું છે.